Elordada sýretshi Erbolat Tólepbaıdyń «Bes kún» atty kórmesi ótedi
ASTANA. QazAqparat - Qazaqstan Respýblıkasy Ulttyq mýzeıi Halyqaralyq mamandandyrylǵan «Astana EKSPO-2017» kórmesiniń ashylý qarsańynda sýretshi Erbolat Tólepbaıdyń «Bes kún» atty jeke kórmesin ashady, dep habarlaıdy Ulttyq mýzeıdiń aqparattyq-ımıdjdik jumys qyzmeti.
Erbolat Tólepbaı - Qazaqstannyń eń tanymal zamanaýı sýretshileriniń biri. Onyń shyǵarmashylyǵy óz elimizde de, shetelderde de keńinen tanymal. Kórmege boıaý jan tolǵanysy men sezimdi jetkize alǵan, al kóp boıaýly órnekter tuńǵıyqtan syr shertip turǵan sýretshiniń ózine tán kórkem sýrettik naqyshpen oryndalǵan 60-tan astam týyndylary qoıylady. Erbolat Tólepbaıdyń jańa kórkem týyndylarynyń basty keıipkerleri - áıelder, olardyń ana, qaryndas, áıel, qyz retindegi barlyq taǵdyrlary. Sýretshi óz sýretterinde qashanda jasaýshy bolyp qala beretin áıeldiń qasıetti beınesin jyrlaıdy.
«Bes kún» kórmesi sýretshiniń anasy Uldar apanyń 100 jyldyǵyna arnalady. Ol kisi Ońtústik Qazaqstanda qurmetti, syıly halyq emshisi bolǵan. Erbolat 85 jastaǵy anasynan bul dúnıeden óterdiń az aldynda: «Anashym, seniń ómiriń jyldam ótti me?», - dep suraıdy. Uldar apa: «Balam, meniń ómirim bes kúndeı bolyp ótti. Birinshi kúnimdi ózimdi kishkentaı qyz retinde esime alamyn. Ekinshi kúnimde turmysqa shyqtym. Úshinshi kúnimde bosandym. Sodan keıin tórtinshi kúni ózimdi aqyl toqtatqan áıel retinde bilemin. Mynaý senimen sóılesip otyrǵan sátim besinshi kúnim», - dep jaýap bergen eken.
Erbolat Tólepbaı - QR Sýretshiler odaǵynyń múshesi, QR Eńbek sińirgen óner qaıratkeri, QR Memlekettik syılyǵynyń laýreaty, Reseı, Chehııa, Qyrǵyzstan Kórkem sýret akademııalarynyń akademıgi. Sýretshiniń týyndylary Memlekettik Tretıakov galereıasynda, Reseı Federatsııasynyń mýzeılerinde, QR Ulttyq mýzeıinde, Á.Qasteev atyndaǵy Memlekettik óner mýzeıinde, Qazaqstan Espýblıkasynyń oblystyq mýzeılerinde, sol sııaqty Qazaqstan, TMD, Eýropa, AQSh jáne Azııadaǵy jeke kollektsııalarda saqtaýly.
Kórme 6-maýsym kúni saǵat 18.00-de bastalady.
