Elordada «Surapyl jyldar qaharmandaryna taǵzym» atty kitaptyń 4-shi tomynyń tanystyrylymy boldy
«Bul kitap sol bir janqııar erlik pen eleýli eńbekke toly jyldardy jadymyzda saqtap saralaý úshin jazylǵan aldyńǵy kitaptardyń qorytyndysy deýge bolady. Munda ardager aǵa urpaqtyń esteligi de, búgingi býynnyń oı-tolǵamy da kórinis tapqan», dep atap ótken Astana qalalyq ardagerler keńesiniń tóraǵasy Qýanysh Alpysbekov jınaqtyń shyǵýyna zor úles qosqan birqatar azamattarǵa maqtaý gramotasyn tabys etti.
Sondaı maqtaý qaǵazyna ıe bolǵan azamattyń biri Astana qalalyq ardagerler keńesiniń bas sarapshysy Haıdar Meńdiqulovtyń sózine qaraǵanda, basylymnyń sońǵy tomyna Uly Otan soǵysyna qatysyp, odan keıingi jyldary elimizdiń kórkeıýi jolynda eńbek etken maıdangerlerdiń, balalyq shaǵyn sum soǵys jalmap, maıdan úshin kúni-túni jumys istegen osy kúngi ardagerlerimizdiń estelikteri engen. «Bul kitap oqyrmanǵa, ásirese jasóspirimderge úlken sabaq bolady dep esepteımin. Oǵan Aqmola oblysy men Astana qalasynyń myńdaǵan azamaty enip otyr. Ardagerlerdiń ómirinen syr shertetin maqalalardyń basym bóligi merzimdi basylymdarda jaryq kórgen jarııalanymdar», dedi H.Meńdiqulov.
1400 danamen jaryq kórgen kitap mektepterge, soǵys, eńbek ardagerlerine tegin taratylmaq. Búgin tusaýy kesilip otyrǵan jınaqtyń sońǵy tomy alda kele jatqan Uly Jeńistiń 65 jyldyǵyna arnalǵan is-sharalardyń biri bolyp eseptelinedi.
Alqaly jıynǵa elordalyq soǵys jáne eńbek ardagerleri, qalalyq ákimshiliktiń, qoǵamdyq birlestikterdiń ókilderi qatysty.
Aıta keteıik, Aqmola oblysynan Otan qorǵaýǵa attanǵan 69 880 azamattyń 33 950-i qaıta oralmady. Sonymen qatar 437 aqmolalyq maıdanger surapyl soǵys barysynda kórsetken erlikteri úshin Keńes Odaǵynyń Batyry ataǵyn aldy.
