Elordada «Súndet-2021» aktsııasy ótip jatyr
NUR-SULTAN. QazAqparat - Elordalyq emhanalarda «Súndet-2021» aktsııasy aıasynda áleýmettik az qamtylǵan, kópbalaly otbasylardyń múgedek balalaryna súndetke otyrǵyzý rásimi tegin jasaldy, dep habarlaıdy QazAqparat qala ákimdiginiń resmı saıtyna silteme jasap.
Sondaı-aq sozylmaly aýrýǵa shaldyqqan jáne tolyq emes otbasylardyń ul balalary erekshe nazarǵa alyndy.
Súndetteýdi ýrolog jáne óz isiniń sheberi, Nur-Sultan qalasynyń Qoǵamdyq densaýlyq saqtaý basqarmasynyń basshysy Tımýr Muratov jáne №2 kópsalaly qalalyq balalar aýrýhanasynyń joǵary bilikti mamandary jasady. Tımýr Muratov balalardyń jaǵdaıyn bilip, biraz suhbattasty.
«Bul bizdiń ekinshi ulymyz, 3 jasta. 10 kún buryn balamyzǵa dástúr týraly kóp aıtyp, moraldy turǵydan daıyndaǵanbyz, naǵyz jigit bolady dep sendirdik. Uıymdastyrýshylar men emhana basshylyǵyna alǵys bildiremiz. Joǵary deńgeıde uıymdastyrylǵan is-shara, barlyǵy qarastyrylǵan», - dedi súndetke otyratyn balanyń anasy Lıazzat Aıtýǵanova.
Jyl saıynǵy aktsııanyń maqsaty — kópbalaly jáne tolyq emes otbasylardan shyqqan múgedek jáne sozylmaly aýrýlary bar balalarǵa áleýmettik kómek kórsetý .
Aktsııa aıasynda bul medıtsınalyq qyzmet jyl saıyn aqysyz túrde júzege asyrylady.
Súndetteýdi qalalyq №9 emhanada hırýrgtar men ýrologtar ótkizdi. Bul jerde 2-5 ota jasaý kabınetteri uıymdastyrylǵan.
