Elordada sýǵa túsý maýsymyna daıyndyq qalaı júrip jatyr
Nur-Sultan qalasy TJD baspasóz qyzmetiniń habarlaýynsha, elordada tekserý komıssııasynyń qorytyndysy boıynsha halyq shomylatyn 23 oryn anyqtaldy, onyń ishinde 3-ýine ruqsat etilgen (ortalyq jaǵajaı, «Úsh móńke» jáne «Astanalyq aýla» demalys aımaqtary), 20 oryn – tyıym salynǵan jerler. Bıyl 10 ýchaskede qalalyq tegin jaǵajaılar (Almaty-3, Baıqońyr-1, Esil-3, Saryarqa-3) qosymsha ashýdy qarastyrý usynylady.
«Sýǵa shomylý maýsymy jyl saıyn 1 maýsymda ashylady. Sýǵa shomylý kezeńine daıyndyqty kúsheıtip jatyrmyz. Sońǵy úsh jylda Nur-Sultan qalasynyń ózinde 43 adam sýǵa ketip, qaıtys bolǵan. Onyń árbir úshinshisi – 9-15 jas aralyǵyndaǵy bala. Sońǵy úsh jylda 50 adamdy sýǵa ketip qalýdan saqtap qaldyq, onyń ishinde 14-i – bala. Qazir qalalyq ákimdikpen birlesip sýǵa túsetin jerlerdiń bárin tekserip, qarap shyqtyq. Qala kóleminde sýǵa túsetin 23 jer bar, onyń 3-eýi sýǵa túsýge ruqsat berilgen jer bolsa, 20-sy ruqsat berilmegen jer. Bıyl qala ákimine usynys jasap, sýǵa túsýge bolatyn 3 jeke menshik jerge qosymsha 10 oryn ashýdy josparlap otyrmyn. Qalalyq ákimdikke baǵynatyn azamattyq qorǵanysty qamtamasyz etetin ortalyq bar. Sol jerdiń mamandaryn ózimizdiń jedel qutqarý jasaǵynda daıyndyqtan ótkizip, jańadan ashylatyn qalalyq 10 sýǵa túsý oryndarynda qutqarýshy retinde qoldanamyz», - deıdi Nur-Sultan qalasy tótenshe jaǵdaılar komıtetiniń bastyǵy, polkovnık Baýyrjan Syzdyqov.
Onyń aıtýynsha, qazirgi tańda qutqarýshylar, aýdandyq ákimdik mamandary sol oryndardy daıyndaý ústinde.
«Statıstıkaǵa súıensek, sýǵa ketkenderdiń 80% – mas kúıinshe sýǵa túskender. Odan keıin ata-ana qaraýynsyz qalǵan balalar bar. Qazaqta «Syryn bilmeseń – sýǵa túspe» degen sóz bar. Qyr-syryn bilmeıtin sý kózderine baryp, batyp ketetinder bar. Osyǵan nazar aýdarý kerek. Ystyq kúnderi jaǵajaıda demalýshylardyń sany 1000 adamǵa deıin bolady. Sondyqtan sýdaǵy qaýipsiz demalys ózin-ózi durys ustaý jáne azamattardyń «sýdaǵy qaýipsizdik erejelerin» oryndaýyna baılanysty», - deıdi ol.
Jyl saıyn ruqsat etilmegen shomylý oryndary sanynyń ulǵaıý úrdisi baıqalady. Buǵan ruqsat etilgen qalalyq jaǵajaılardyń sany men qashyqtyǵynyń jetkiliksizdigi, qala akvatorııasy boıyndaǵy jańa turǵyn úı alaptary men kóp qabatty úılerdiń qurylysy, sondaı-aq halyq sanynyń artýy sebep bolýda.
«Qutqarýshy bolyp júrgenime 6 jyl boldy. Osy ýaqytqa deıin shamamen onnan astam adamdy sýǵa batýdan qutqaryp qaldym. Kóbine 14-16 jas aralyǵyndaǵy balalardy qutqardym. Kóbi tehnıkalyq qaýipsizdik sharalaryn saqtamaǵandyqtan sýǵa batady. Bala kezimde ózim de sýǵa bata jazdaǵanmyn, bul oqıǵa meniń osy salaǵa kelýime sebep boldy. Kún saıyn sýda júzý, alpınızm, júgirý, sekirý sııaqty jattyǵý túrlerin jasaımyz», - deıdi qutqarýshy Abylaıhan Ómirbaev.
Sonymen qatar, 9 mamyrdan bastap qala aýmaǵynda qala ákimdigimen birlesip tyıym salý belgileri men aqparattyq stendter, shomylý oryndarynyń túbin tekserý, demalys aımaqtary men qalalyq jaǵajaılardyń ıelerine aqparattyq hattardy tapsyrý júrgiziledi. Esil ózeninde barlyǵy 90 tyıym salatyn belgi, 20 aqparattyq stend, 20 júzgish qaltqy ornatylady. Sýǵa shomylý kezeńinde kúndelikti patrýldeýge jeke quramnyń 20 adamy, 14 qaıyq pen 1 sý gıdrotsıkli, sondaı-aq qoǵamdyq qutqarýshylar qatarynan 30 adam jáne qala ákimdiginiń Azamattyq qorǵanys ortalyǵyn qamtamasyz etý ortalyǵynan 15 adam qatysady.
«Biz árdaıym qaýipsizdik erejelerin saqtap júremiz. Tabıǵat aıasyna shyqqan adamdar spırttik ishimdik iship, sýǵa shomylýǵa tyıym salynǵan jerlerge sýǵa túsedi. Osyndaı erejelerdi saqtamaǵandyqtan sýǵa batý oqıǵalary bolady. Ata-anasynyń qaraýynsyz qalǵan balalar da sýǵa batyp ketedi. Mysaly, 2018 jyly kóktemde 2 jasar bala sýǵa batyp bara jatqanyn kórip, júgirip bardym. Ol muz erip jatqan kez edi. Balany sýdan shyǵaryp, alǵashqy kómek kórsetip, jedel járdem qyzmetkerlerine tapsyrdyq», - deıdi qutqarýshy Danaı Jalǵas.
Sonymen qatar, departament qyzmetkerleri elorda turǵyndary men qonaqtarymen sýdaǵy qaýipsizdik erejeleri týraly aldyn alý jumystaryn júrgizýde. Nur-Sultan qalasy Tótenshe jaǵdaılar departamenti beıtanys jerlerde, mas kúıde sýǵa júzýge bolmaıtynyn eskertedi.
