Elordada sýǵa shomylý oryndarynda eńbek etken volonterler marapattaldy
«Sý jaǵalaýlaryndaǵy adam qaýipsizdigin qamtamasyz etýde bizdiń departament qyzmetkerlerimen birge qalalyq ákimdik, tártip saqshylary, Ulttyq ulan jáne volonterlerdiń úlesi zor. Búginde tótenshe jaǵdaıdy qamtamasyz etý baǵytynda 60 volonter eńbektendi. Onyń 45-i oqýshy jáne stýdent bolsa, qalǵan 15-i jumyssyz adam. Volonterler jaz boıy bizdiń mamandarmen birge jumys istedi. Olardyń adam ómirin saqtaýdaǵy róli erekshe jáne olar qoǵamǵa paıdaly ispen aınalysýda», - dedi Nur-Sultan qalasy Tótenshe jaǵdaılar departamentiniń basshysy Baýyrjan Syzdyqov
TJD basshysy erekshe kózge túsip, úzdik dep tanylǵan volonterge alǵys hat tabys etti.
«Ózińiz baıqaǵanyńyzdaı elde indet taralyp, qıyn kezeń bastalǵaly kóptegen adamdar bir-birine qol ushyn sozyp kómektesýde. Osy oraıda mende óz erkimmen volonter bolyp, qoǵamǵa paıdamdy tıgizgim keldi. Ózim sekildi volonter dostarymmen birge jaz boıy sý jaǵalaýynda júrdik desem bolady. Bizdiń mindet sý mańyndaǵy adamdardyń qaýipsizdigin qadaǵalaý. Volonterlik qyzmetimniń arqasynda adam sýǵa ketken jaǵdaıda, qutqarý jibi men dóńgelekti qalaı qoldanýyn, sol sııaqty alǵashqy kómek kórsetýdi úırendim», - dedi volonter, elordadaǵy №6 mektep gımnazııasynyń 11 synyp oqýshysy Araılym Mádıeva.
Buǵan deıin elordada sýǵa túsý oryndarynyń artatyny týraly habarlaǵan bolatynbyz.
