Elordada sýǵa shomylý maýsymy bastalǵannan beri 2 adam qaza tapty
«Kún saıyn qutqarýshylar, polıtseıler, eriktiler jáne jumyspen qamtý ortalyǵynyń qoǵamdyq qyzmetkerleri turǵyndarǵa shomylýǵa ruqsat etilgen oryndar týraly habardar etip, sýdaǵy qarapaıym qaýipsizdik erejelerin saqtaý arqyly shomylý kezeńinen qaýipsiz ótýdi belsendi júrgizetin reıdtik is-sharalar ótkizedi. Reıdtik is-sharalardyń barysynda Polıtsııa departamentimen birlesip 14 ákimshilik hattama jasaldy. Elordalyq qutqarýshylardyń kúshimen shomylý maýsymy bastalǵannan beri shomylýǵa ruqsat etilmegen ýchaskelerde 3 adam aman-esen qutqaryldy, onyń ishinde 1 bala bar», - dedi basqarma bastyǵy qalalyq kommýnıkatsııalar qyzmeti alańynda ótken brıfıngte.
Onyń atap ótýinshe, júrgizilip jatqan aldyn alý jumystaryna qaramastan, sýdaǵy qaýipsizdiktiń negizgi erejelerin saqtamaý saldarynan shomylý maýsymy bastalǵannan beri 1990 jáne 1996 jyly týǵan 2 adam qaza tapty.
«2022 jyly elordanyń sý aıdyndarynda 6 adam sýǵa batyp ketti, onyń ishinde 5 bala bar. Adam óliminiń barlyq faktileri sýǵa shomylýǵa tyıym salynǵan jáne jabdyqtalmaǵan sý aıdyndarynda tirkelgen», - dedi Azamat Qusaıynov.
TJD ókiliniń dereginshe, Astana qalasynyń ákimdigi Ortalyq jaǵajaıǵa, «Trı peskarıa» demalys aımaǵyna, «Stolıchnyı dvor» jáne Sh.Beısekova kópiri aýdanyndaǵy kommýnaldyq jaǵajaıǵa shomylýǵa ruqsat bergen. Sý aıdyndarynyń ruqsat etilgen jáne tyıym salynǵan ýchaskeleriniń tizbesi «2GIS» kartografııalyq platformasynda ornalastyrylǵan.
«Shomylý kezeńinde kúndelikti 40 qutqarýshy, 2 birlik súńgýirlik jaraqtary bar súńgýirler, 6 birlik júzý quraldary jáne Jumyspen qamtý ortalyǵynan 25 qoǵamdyq qyzmetker reıd jumystaryn júrgizýde», - dedi ol.
