Elordada sýǵa ketken erli-zaıyptylardy qutqarǵandar marapattaldy
NUR-SULTAN. QazAqparat - Elordada sýǵa aǵyp bara jatqan erli-zaıyptylardy qutqarǵan azamattar marapattaldy, dep habarlaıdy QazAqparat qalalyq tótenshe jaǵdaılar departamentiniń baspasóz qyzmetine silteme jasap.
Búgin TJ komıtetiniń tóraǵasy, general-maıor Vladımır Bekker erlik jasaǵan batyrlardy saltanatty túrde quttyqtap, marapattady. Nur-Sultan qalasy TJD «Esil» aýdany TJ basqarmasynyń aǵa ınjeneri Dıas Zaký men QR ІІM TJK Kókshetaý tehnıkalyq ınstıtýtynyń kýrsanty Serik Amanjolov «Sýǵa batqandardy qutqarǵany úshin» medalimen, al balyqshy Rýslan Jámı QR Іshki ister mınıstri Erlan Turǵymbaevtyń alǵys hatymen marapattaldy.
Vladımır Bekker qyzmetkerlerge úzdik jumysy úshin alǵys aıtyp, aldaǵy qyzmetine tabys tiledi, sondaı-aq Rýslan Jámıge adamdardy qutqarý kezinde kórsetken qyraǵylyǵy men janqııarlyǵy úshin rızashylyǵyn bildirdi.
Esterińizge sala keteıik, 10 shilde kúni elordalyq tótenshe jaǵdaılar departamenti qyzmetkerleri sýǵa batyp bara jatqan erli-zaıyptylardy qutqarǵan bolatyn.
Ózenge aǵyp bara jatqan er adam men boıjetkendi kórgen qutqarýshylar oılanbastan sýǵa qoıyp ketken. Aǵyp bara jatqan kelinshekti qýyp jetip, jaǵaǵa shyǵarǵan soń olar er adamdy qutqarý úshin qaıtadan sýǵa sekirdi. Jigitti qutqarýǵa oqıǵa ornyna jaqyn mańda balyq aýlap otyrǵan balyqshy kómekke keldi. Ol da qutqarýshylarmen birge sýǵa súńgidi.
Keıin belgili bolǵandaı, áıeldi quıylma bógette aǵys aǵyzyp áketken. Ony kórgen jigit kelinshegin qutqarý úshin sýǵa sekirgen. Ony da dál osy jerde qatty aǵys ıirimge qaraı tartyp áketken. Qutqarýshynyń, kýrsant pen balyqshynyń kásibı jáne jedel is-áreketiniń arqasynda er adam qutqaryldy.
