Elordada sýdyń baǵasy 3 esege jýyq kóterilmek
ASTANA. Maýsymnyń 9-y. QazAqparat /Marlan Jıembaı/ - Elordada sýdyń baǵasy 3 esege jýyq kóterilmek. «Astana sý arnasy» kásiporny usynysyn Astana qalalyq tabıǵı monopolııalardy retteý departamentine berip otyr. Bul týraly búgin atalǵan mekemeniń basshysy Ýálıhan Dosaev tarıfterdi bekitýge arnalǵan jarııa jıyn barysynda aıtty.
Onyń atap ótýinshe, 2009 jyly qoldanystaǵy smetaǵa sáıkes aýyzsýmen jabdyqtaý shyǵyndary 66 paıyzǵa artqan. Bul oraıda sýmen jabdyqtaý qyzmetiniń 1 tekshe metr sýynyń ózindik quny 29,11 teńge bolsa, qoldanystaǵy tarıftik smetada 21,53 teńge kóleminde belgilengen. Káriz shyǵyndary 100 paıyzǵa artqan. Onyń da 2009 jylǵy 1 tekshe metrine ketken is júzindegi shyǵyny 25,28 teńge bolsa, qoldanystaǵy tarıf kólemi 15,58 teńgeni quraıdy. Al tehnıkalyq sý shyǵyndary 107 paıyzǵa artyp otyr. Bul rette de ózindik qunynyń 1 tekshe metri 13,59 teńge de, qoldanystaǵy tarıftik smeta 7,10 teńge. «Osyǵan oraı Astana qalasynyń tutynýshylaryn ýaqytyly sýmen jabdyqtaýdy qamtamasyz etý maqsatynda retteletin barlyq qyzmet túrlerinde tarıfterdi kóterý qajettigi týyndap otyr», deıdi ol.
Sonymen qatar ol tarıfterdi kóterýge ıtermeleıtin birqatar sebepterdi de alǵa tartady. Onyń sózine qaraǵanda, sońǵy jyldary «Astana sý arnasy» MKK-niń múliktik kesheni birshama ulǵaıa túsken. Máselen, 2005 jyly mekeme balansynda 32 sý júrgizetin sorǵy stansysy, 38 kárizdiń stansy bolsa, qazirgi ýaqytta olardyń sany 63 paıyzǵa artqan. Al sý qubyry jelisi 248, káriz jelisi 77 shaqyrymǵa uzaryp, jeliniń jalpy uzyndyǵy 1,5 ese ósken. Kásiporynda kadr máselesi de ózekti bolyp otyr. Oǵan ortasha jalaqynyń 26 myń teńge, ıaǵnı Astanadaǵy ortasha jalaqydan 4 esege jýyq kem bolýy da áserin tıgizýde. Sondaı-aq aǵymdaǵy jyly mekeme jyldyq shyǵyndar smetasyna sáıkes óz qarajatyna sýmen jabdyqtaý júıeleri nysandaryna jóndeý jumystaryn júrgizbek. Bul maqsatqa kásiporyn qosylǵan qun salyǵynsyz 829,2 mıllıon teńge bólýdi qarastyryp otyr.
Osyndaı negizgi sebepterdi alǵa tartqan Ý. Dosaev sý sharýashylyǵy men káriz júıeleriniń qyzmetterine saralanǵan tarıfter 3 top boıynsha engiziletinin atap ótti. «Sonymen sýmen jabdyqtaý qyzmetteriniń tarıfteri toptar boıynsha saralaǵan jobalyq kólemi QQS-ti qospaǵanda sýdy tutynýdyń bir aılyq shekti mólsherinde adam basyna 3 tekshe bolyp belgilenedi jáne 27,14 teńge bolady. 2 top 3 pen 6,5 tekshe metr aralyǵynda 54,15 teńge, 3-shi top 6 tekshe metrden asatyndarǵa 105,9 teńge bolady. ıAǵnı tarıfter 3 ese ósedi», dedi ol.
Bul tarıfter aǵymdaǵy jylǵy shildeniń 1-inen bastap qoldanysqa engizilmek. Alaıda QR Tabıǵı monopolııalardy retteý agenttiginiń qalalyq departamenti berilgen ótinim boıynsha naqty sheshimin maýsym aıynyń sońyna taman qabyldaıdy.
