Elordada sý tasqynynyń aldyn alý jumystary júrgizilýde
ASTANA. 31 naýryz. QazAqparat - Kóktem kelip, kún jylynǵaly jer-dúnıe de býsanyp jatyr. Bıyl qar jyldaǵy mólsherden birshama kóp túskenin eskersek, ózge óńirlerdegi sııaqty astanalyqtardy da sý basý qaýpi alańdatyp otyr. Alaıda, qar qala syrtyna ýaqytyly shyǵarylyp, kúndiz-túni jumys toqtaǵan joq. Dese de, tabıǵattyń tosyn syıyn boljap-bilý qıyn. Sondyqtan qaladaǵy aýdan ákimdikteri aryndap aqqan aǵyn sýdy aýyzdyqtaýdyń qamyna myqtap kirisken, dep habarlaıdy elordanyń resmı saıtynan.
«Esil aýdanynda sý tasqynyna qarsy áreketterge jaýap beretin arnaıy komıssııa qurylǵan. Mezgilimen jınalystar ótkizemiz. Aýdanda sý basý qaýpi bar úsh oryn bar. Olar - Shubar turǵyn úı alaby, Shyǵys Ilınka jáne Úrker turǵyn úı alabtary, Qorǵaljyń tas joly Beısekova kóshesinen «Rýbej» postyna deıin. Qys boıy jumysty toqtatqan joqpyz. Qar kóp tústi, soǵan qaramastan jaýǵan qardy taý ǵyp úımeı, bar tehnıkany jumyldyryp, kúni-túni jumys júrgizdik», deıdi Astana qalasy Esil aýdany ákiminiń orynbasary Berik Ahmetjanov.
«Esil» aýdanynda sanıtarlyq tazalaý, mehanıkalyq, qolmen qar kúreý jáne oramishilik aýlalardy jınaýdy 26 merdigerlik uıym júrgizedi. Bir aýsymda 458 tehnıka jumyldyrylady. 2012 jyldyń 4 qarashasynan 2013 jyldyń 27 naýryzyna deıin aýdannan 1 666 459 tekshe metr qar shyǵarylǵan. 31 000 ga jerdi alyp jatqan aýdan 9 oramǵa, 19 telimge bólinedi.
«Aýdanda sý jınalǵan jerler de bar. Biraq, turǵyndar qorqatyndaı úılerine sý kirý qaýpi bar dep aıta almaımyn. Máselen, Shyǵys Ilınkadaǵy sektorlyq telimder negizinen jeke menshikterge qaraıdy. Sonda kishkene sý máselesi bolýy múmkin. Óıtkeni ol jerdegi úıler tómengi jerde ornalasqan. Byltyrdan bastap aryq qazylǵan. Jınalǵan sýdyń birazy sonymen ketedi. Endi syrttan sý kelmes úshin qorǵanysh bógetterin jasap jatyrmyz. Jumys toqtaýsyz júrgizilýde», dep atap ótti Astana qalasy Esil aýdany ákiminiń orynbasary Berik Ahmetjanov.
Bıylǵy jyldyń 25 naýryzynda Esil aýdany turǵyndarynan túsken ótinishter boıynsha Shyǵys Ilınka turǵyn úı alabyna usaq tastar jóneltilgen. Aýa raıynyń qubylmaly bolýyna baılanysty sý tasqynynyń aldyn alý jumystary jalǵasyn tabatyn bolady.
