Elordada sý tasqynyna qarsy jumystar jalǵasýda
NUR-SULTAN. QazAqparat - Elordada sý tasqynyna qarsy is-sharalar qarqyndy júrip jatyr. Qalada sý tasqyny qaýpi bar ýchaskeler sany ótken jyldarmen salystyrǵanda 25-ke deıin azaıdy, dep habarlaıdy qalalyq ákimdiktiń baspasóz qyzmeti.
Azamattyq qorǵaý organdary, kommýnaldyq qyzmetter turaqty daıyndyqqa keltirildi. Tasqyn sýlardy ótkizý boıynsha keshendi is-sharalar jospary bekitildi.
Qardy ýaqytyly tazalaý erekshe baqylaýǵa alyndy, sonymen qatar, qardyń erýi saldarynan jeke turǵyn úılerdi sý basýyna jol bermeý maqsatynda 25 sý tasqyny qaýpi bar ýchaskeler men eldi mekenderdegi qardy tazalaýǵa erekshe nazar aýdaryldy.
Búgingi tańda qala aýmaǵynan 4,5 mln tekshe metrden astam qar shyǵaryldy, bul ótken jyldyń sáıkes kezeńimen salystyrǵanda kóp. Bul rette «Qazgıdromet» RMK derekteri boıynsha bıylǵy qysqy kezeńde túsken jaýyn-shashynnyń naqty kólemi – 157,1 mm, al norma – 99 mm.
«Sondaı-aq, nóserli káriz jelilerin tazalaý jumystary turaqty túrde júrgizilýde. 2022 jyldyń basynan beri barlyǵy 3940 m kollektor jýyldy, sol sııaqty jaýyn qabyldaıtyn qudyqtar tazartyldy jáne t.b. Esil, Aqbulaq jáne Sarybulaq ózenderiniń bógetterin, kópirleri men arnalaryn tekserý, gıdrotehnıkalyq qurylystardyń ázirligi, jaǵalaýdy nyǵaıtý jumystaryn júrgizý jáne t. b. boıynsha jumystar júrgizilýde», - dep atap ótti elorda ákiminiń orynbasary Nurlan Nurkenov.
