Elordada sý tasqynyna qarsy aýqymdy is-shara júrgizilip jatyr
NUR-SULTAN. QazAqparat - Elordada sý tasqynyna qarsy saqtyq sharalary júrgizilip jatyr. Ózen arnasyn qaıta jańartý, sý rettegish bóget salý, aryqtardy, nóser sýyna arnalǵan júıelerdi tazartý jumystary qolǵa alynǵan, dep habarlaıdy QazAqparat ákimdikke silteme jasap.
Elorda ákimi Altaı Kólginov sý rettegish bóget salý, ózen arnasyn keńeıtý, úıindi bóget salý, dambany bıiktetý jumystarynyń barysyn tekserdi.
«Sý rettegishke kúrdeli jóndeý júrgizý qajet. Ekologııa mınıstrligimen birlesip tıisti ótinim jiberildi. Bul rettegishtiń ótkizý qabiletin arttyrýǵa múmkindik beredi. Búginde qalany jáne shetkeri aımaqtardy sý tasqynynan qorǵaıtyn sý rettegishtiń jumys tártibi bekitildi. Maıbalyq kóliniń arnasyn qardan tazartyp jatyrmyz. Uzyndyǵy — 5,5 shaqyrym. Maıbalyq kólinen «Nura-Esil« kanalyna deıingi arnanyń ótkizý qabiletin arttyramyz. Bul sharalardyń barlyǵy ózen sýynyń kedergisiz ótýin qamtamasyz etýge jáne sý basý qaýpin azaıtýǵa múmkindik beredi», - dedi qala ákimi Altaı Kólginov. Elorda ákimi Altaı Kólginov eldi mekenderge erekshe kóńil bólinetinin atap ótti. Ilınka kentindegi dambany bıiktetilgen, Óndiris kentindegi ózen arnasyn qaıta jańartý júrgizilip jatyr. Kóktal-1 eldi mekeninde topyraqtan ýaqytsha úıme jal turǵyzyldy. Ózen arnasyn qalpyna keltirý kelesi jyldary sýdy kedergisiz ótkizýge múmkindik beredi.
Búgingi tańda qala aýmaǵynan 6 mln 385 myń tekshe metr qar shyǵaryldy. Ótken jylmen salystyrsaq, byltyr úsh jarym ese az qar shyǵaryldy. Qysta qar normasy 99 mm, ıaǵnı eki ese artyq tústi.
