Elordada sý tasqyny bola ma - TJD jaýap berdi
NUR-SULTAN. QazAqparat - Bıyl elordada byltyrmen salystyrǵanda tórt esege jýyq kóp qar jaýdy. Bul týraly Nur-Sultan qalasy tótenshe jaǵdaılar departamentiniń bastyǵy Baýyrjan Syzdyqov aıtty, dep habarlaıdy QazAqparat tilshisi.
Kóktemgi sý tasqynyna daıyndyq aıasynda 25-27 aqpan aralyǵynda Nur-Sultan qalasy tótenshe jaǵdaılar departamenti «Kóktem-2020» respýblıkalyq komandalyq-shtabtyq oqý-jattyǵýyn ótkizedi.
«Elordany sý basatyn-baspaıtynyn aıtý úshin birneshe faktordy eskerý kerek. Birinshiden, ol jaýǵan qardyń kólemine baılanysty. Bıyl qar byltyrmen salystyrǵanda tórt esege jýyq kóp jaýdy. Ekinshiden, qardaǵy ylǵaldyń deńgeıine baılanysty. Qardyń ylǵaldylyǵy byltyrmen salystyrǵanda 20-40% joǵary. Osy turǵydan qaraǵanda qaýip bar», - deıdi Nur-Sultan qalasy tótenshe jaǵdaılar departamentiniń bastyǵy Baýyrjan Syzdyqov.
Ol sý tasqyny kúzgi topyraqtyń ylǵaldanýyna da baılanysty ekenin aıtty.
«Úshinshiden, kúzgi topyraqtyń ylǵaldanýyna baılanysty. Topyraqtyń ylǵaldanýy byltyrmen salystyrǵanda tómen. Bul - jaqsylyqtyń nyshany. Tórtinshiden, jerge toń túsýine de baılanysty. Tońnyń qatýy da byltyrmen salystyrǵanda tómen. Qazirgi ýaqytta jerde 50-52 mm toń bar. Qazaqta «Kúndiz - kıiz, túnde - múıiz» degen maqal bar. Eger qar túnde qatyp, kúndiz erıtin bolsa jáne aýa raıy birden jylyp ketpeıtin jaǵdaıda sý tasqyny kezeńinen birtindep shyǵyp ketýge bolady», - deıdi ol.
