Elordada sý dobynan Qazaqstan chempıonaty ótýde
ASTANA. 15 jeltoqsan. QazAqparat - Astanada 1996-1998 jyldary týǵan jasóspirimder arasynda sý dobynan Qazaqstan chempıonaty ótýde. Jetkinshek qatysýshylar arasyndyǵy ulttyq birinshiliktiń birinshi oıyny «Qazaqstan» sport saraıy basseıninde ótti.
Astana qalasynyń saıty týrızm, dene tárbıesi jáne sport basqarmasyna silteme jasap habarlaýynsha, alǵashqy bolyp tartysqa Almaty men Astana qalalarynyń («Astana» SK birinshi quramy) oıynshylar komandasy tústi. Aıdyn ıeleri qarsylastarynan basym túsip, olardy 9:17 esebimen tize búktirdi.
Ekinshi oıynda «Astana-3» SK komandasy Taraz qalasynyń № 4 sport mektebiniń tárbıelenýshilerimen kúsh synasty. Tarazdyqtar ózderiniń tájirıbesi kem qarsylastaryna esh múmkindik bermedi. Olardy 30:1 esebimen oısyrata jeńdi. .
Úshinshi oıynda eki elordalyq komanda tartysqa tústi. Olar - «Astana» SK ekinshi jáne tórtinshi quramalary bolatyn. Alǵashqysy basymyraq bolyp, 19:8 esebimen oıyndy támamdady.
Qorytyndy kezdesýde «Astana-3» komandasy Almatynyń sport mektebi komandasymen oınady. Bul joly almatylyqtar basseın ıelerinen aılalaryn asyryp baqty. Esep - 5:8.
«Jarys 18 jeltoqsanǵa deıin jalǵasady. Oıynǵa endi eresek jigitter men qyzdar aralasady», - delingen habarlamada.
