Elordada sý basatyn kósheler máselesi qalaı sheshiledi
NUR-SULTAN. QazAqparat – Nur-Sultan qalasynyń ákimi Altaı Kólginov jańbyrda elorda kóshelerin sý basý máselesi qalaı sheshiletinin aıtyp berdi, dep habarlaıdy QazAqparat tilshisi.
«Nóser kárizderi boıynsha óte ózekti másele bar. Oǵan kóp shaǵym tústi. Baýyrjan Momyshuly dańǵylynda problemalyq ýchaskeler bar. Biz qubyrlardy eki esege keńeıttik, qosymsha sorǵylar qoıdyq, káriz-tazartý oryndaryn keńeıttik, birqatar jergilikti káriz-tazartý qurylystaryn saldyq, osylaısha Baýyrjan Momyshuly dańǵyly, Uly dala, Turan dańǵyly, Respýblıka dańǵyly, Baraev kóshesi boıynsha problemalyq máselelerdi sheshtik. Mundaı oryndar áli de kóp. Eń basynda 130 sý basý orny anyqtalǵan edi», - dedi A. Kólginov Ortalyq kommýnıkatsııalar qyzmetinde ótken baspasóz máslıhatynda.
Ákimniń aıtýynsha, bul máselede júıeli jumystar júrgizilip jatyr. Arnaıy kompanııa kún saıyn káriz qubyrlaryn tazartýmen aınalysady. Tek bıyldyń ózinde káriz qurylystarynan 35 myń tonnaǵa jýyq qoqys shyǵarylǵan.
