Elordada stýdenttik qurylys jáne «Jasyl el» jastar eńbek jasaqtarynyń qatarynda 1 myń stýdent eńbek etti
ASTANA. Qyrkúıektiń 17-si. QazAqparat /Jasulan Amanbaıuly/ - Astana qalasy stýdenttik qurylys jáne «Jasyl el» jastar eńbek jasaqtaryna qosylǵan jastardyń sany byltyrǵy jylmen salystyrǵanda eki esege ósken.
Bul týraly búgin eńbek maýsymnyń jabylý saltanatynda Astana qalasy stýdenttik qurylys jáne «Jasyl el» jastar eńbek jasaqtary shtabynyń basshysy Rahat Hamıdýllın málim etti.
R. Hamıdýllınniń aıtýynsha, bıyl stýdenttik qurylys jáne «Jasyl el» jastar eńbek jasaqtarynyń qataryndaǵy jastardyń sany byltyrǵy jylǵa qaraǵanda eki esege ósken. Ótken jyly eńbek jasaqtaryna 500-ge tarta jas tartylǵan bolsa, bıylǵy jyly myńǵa tarta stýdent jumyspen qamtamasyz etilgen.
«Eńbek maýsymy mamyr-tamyz aılary aralyǵynda ótedi. «Jasyl el» jastar jasaǵy qalanyń saıabaqtarynda ǵana emes, elordanyń jasyl beldeý qurý jumysyna da atsalysyp júr. Al stýdenttik qurylys jasaqtary qalanyń qurylys nysandarynda, jol tóseýde eńbek etedi», deıdi ol.
Eńbekpen qamtý jobasyna jyl saıyn stýdentterdiń qyzyǵýshylyǵy artyp keledi. Basty sebep - mundaǵy turaqty eńbekaqy (árbir jaýynger ortasha eseppen 30-40 myń teńge alady) men mol tájirıbe jınaqtaý múmkindigi.
Eńbek maýsymynyń jabylý saltanatynda eń úzdik jaýyngerler, úzdik komandırler men úzdik sheberler baǵaly syılyqtarmen marapattaldy. Sonymen qatar eńbek maýsymyna belsendi atsalysqan joǵary oqý oryndary jáne jumys berýshiler alǵys hattarǵa ıe boldy.
Eńbek maýsymynyń jabylýyna qatysty Respýblıkalyq shtabtyń qorytyndy jıyny Aqtóbe qalasynda ótedi.
