Elordada stýdentter ózenge batyp bara jatqan balany qutqardy
NUR-SULTAN. QazAqparat – Elordadaǵy Eýrazııa ulttyq ýnıversıtetiniń Fızıka-tehnıkalyq fakýltetiniń birinshi kýrs stýdentteri Maǵjan Sultanov pen Dıas Kamalov ýnıversıtettiń bas ǵımaraty janynda Aqbulaq ózeninde sýǵa batyp bara jatqan balany qutqaryp qaldy, dep habarlaıdy QazAqparat atalǵan JOO-nyń baspasóz qyzmetine silteme jasap.
Oqıǵa 2021 jyldyń 26 naýryz kúni keshke qaraı oryn aldy. Ýnıversıtetten shyqqan stýdentter kómek surap aıqaılaǵan balanyń daýsyn estıdi. Dereý ózenge qaraı júgirip, 8-9 jastaǵy sýǵa batyp bara jatqan balany kóredi.
Kóp oılanbastan olar kómekke asyqty. Muzǵa qarmanǵan balany kórip, sýdan shyǵaryp, ústindegi kıimderin sheship, orap alady.
Osy kezde JOO qyzmetkeri Botagóz Parathan jubaıymen birge jaqyn mańda júrgen, olardy avtokólikke salyp, balany úıine aparýdy usynady.
Úıge barǵan soń stýdentter balany qurǵaq kıimge aýystyrýǵa kómektesip, jyly sýsyn berip, ata-anasyna oqıǵa týraly habarlaıdy.
JOO-nyń baspasóz qyzmetine bergen suhbatynda Maǵjan óz qaýipsizdigi týraly bir mınýt ta oılanbaǵanyn aıtty. «Mende bir ǵana oı boldy, - deıdi ol – Qaıtkende balany qutqarý!».
Maǵjannyń ózi otbasyndaǵy jalǵyz ul. Ol ıadrolyq fızıka mamandyǵy boıynsha oqıdy. Bul mamandyqty tańdaǵanyna qýanyshty, óıtkeni ol atomdar men molekýlalarmen jumys istegendi unatady.
Taǵy bir keıipker Dıas Kamalov Tehnıkalyq-fızıka mamandyǵy boıynsha grantpen bilim alady. Qostanaı oblysy Rýdnyı qalasynda týǵan, otbasynyń kenjesi. Maǵjan men birge ol mundaı sátterde qorqynysh týraly oılaýdyń ózi artyq dep esepteıdi.
