Elordada stýdentter arasynda ótken ІT baıqaýdyń jeńimpazdary anyqtaldy
«Jarysqa qatysýǵa elimizdiń barlyq óńirinen 107 komanda ótinish berdi. 230 stýdentten quralǵan 72 komanda fınalǵa joldama aldy. Júlde qory 3,5 mıllıon teńgeni qurady. Jeńimpaz stýdentter aqshalaı syılyqtarmen qosa, Daryn online, BTS Education, EDUS jáne Mail.kz jáne basqa da qazaqstandyq IT-kompanııalarda jumysqa ornalasý múmkindigine ıe boldy. Sonymen qatar keıbir tsıfrlyq sheshimder óz ınvestorlaryn taýyp úlgerdi», - dep jazdy Ashat Aımaǵambetov Facebook paraqshasynda.
Mınıstrdiń aıtýynsha, baıqaý qatysýshylary bilim berý salasy boıynsha óte qyzyqty tsıfrlyq jobalardy usynǵan.
«Qazylar alqasynyń sheshimimen Nazarbayev University jáne Astana IT University stýdentteri jeńimpaz atandy. Ekinshi oryndy Nazarbaev ýnıversıtetiniń taǵy bir komandasy jeńip aldy. Úshinshi oryn Ǵ.Dáýkeev atyndaǵy Almaty energetıka jáne baılanys ýnıversıtetiniń, Suleyman Demirel University jáne Astana IT University stýdentterinen quralǵan komandasyna buıyrdy», - deıdi vedomstvo basshysy.
Sondaı-aq, Ashat Aımaǵambetov jeńipazdardy quttyqtap, alǵysyn jetkizdi.
Buǵan deıin elordada stýdentter arasynda ІT salasy boıynsha baıqaý ótip jatqanyn habarlaǵan edik.