Elordada stýdent jigit 3 balany órtten qutqardy
NUR-SULTAN. QazAqparat - Búgin Nur-Sultan qalasynda kópqabatty úı órtenip, 2-kýrs stýdenti úsh balany órtten qutqardy, dep habarlaıdy QazAqparat qalalyq tótenshe jaǵdaılar departamentine silteme jasap.
Búgin elordanyń Beıbitshilik kóshesindegi kópqabatty úıden órt shyqqan bolatyn. Oqıǵa kezinde L.Gýmılev atyndaǵy Eýrazııa ulttyq ýnıversıtetiniń 2-kýrs stýdenti Nursultan Ysmaǵulov 3 balany qutqardy.
«Jas jigittiń sózine qulaq túrsek, ol dostarymen birge saıabaqta serýendep júrgen. Synǵan terezeniń daýsy men adamdardyń aıǵaıyn estigen ol dostarymen birge oqıǵa ornyna jetti. Olar kelgende terezeden er adam kómekke shaqyryp, «4 balamdy qutqaryńdarshy» dep aıǵaılap jatqan. 21 jastaǵy Nursultan esh oılanbastan úı janyndaǵy dúkenniń shatyry arqyly 2-qabatqa órmelep shyǵyp, páterdiń terezesin syndyrǵan. Osylaısha ol úsh jetkinshekti janyp jatqan úıden alyp shyqty. Otaǵasy men taǵy bir balany sol sátte kelip jetken órt sóndirýshiler baspaldaq arqyly qutqardy» delingen habarlamada.
Nursultan Ysmaǵulov - Qostanaı oblysy Arqalyq qalasynyń týmasy. Eýrazııa ulttyq ýnıversıteti aqparat jáne tehnologııa fakýltetiniń 2-kýrsynda oqıdy.
Nur-Sultan qalalyq tótenshe jaǵdaılar departamenti jas jigitke batyldyǵy men ójettigi úshin alǵys aıtty. Departament basshylyǵy batyrdy marapattaýdy uıǵaryp otyr.
