Elordada sporttyq-medıtsınalyq ortalyq ashylady
NUR-SULTAN. QazAqparat – Elordada alǵash ret sporttyq-medıtsınalyq ortalyq ashylmaq. Bul týraly qalalyq Dene shynyqtyrý jáne sport basqarmasynyń basshysy Samat Erǵalıev málim etti, dep habarlaıdy QazAqparat tilshisi.
«Elorda sportshylary 2014 jyldan bastap №5 qalalyq emhanadan tekserýden ótip júr. Sportshylar jarys aldyndaǵy medıtsınalyq tekserýden emhanada kópshilikpen birge ótedi. Bul óz kezeginde sportshylarǵa qolaısyzdyqtar týǵyzyp, olardyń daıyndyǵy men saýyqtyrý protsesi sapasyna áser etedi. Osy sebepti sportshylar qala ákimimen kezdesýde bólek medıtsınalyq mekeme berýdi surady. Usynys qoldaý taýyp, bıyl elordada tuńǵysh ret arnaıy sporttyq-medıtsınalyq ortalyq ashylatyn boldy», - dedi Samat Erǵalıev.
Onyń sózinshe, ortalyqta sportshylarǵa tereńdetilgen medıtsınalyq tekserýler júrgiziledi.
«Sporttyq-medıtsınalyq ortalyq sportshylardyń ońalýy jáne densaýlyǵyn qalpyna keltirýge múmkindik beredi. Sondaı-aq, sportshylardyń densaýlyǵyn qadaǵalap, jaraqat alǵan jaǵdaıda emdeý úshin bilikti dárigerlerdi tartý qolǵa alynyp jatyr. Jáne sporttyq dárigerlermen qatar psıholog, massajıst jáne sportshylardyń tamaqtanýyn qadaǵalaıtyn mamandar bolady», - deıdi ol.
Aıta ketsek, buǵan deıin astanalyq balalar men jasóspirimderdiń sportpen tegin túrde shuǵyldana alatyndyǵy habarlanǵan bolatyn.
Sondaı-aq, basqarma basshysy S. Erǵalıev bıyl elordada qandaı sport nysandarynyń ashylǵany jaıly aıtty.
