Elordada sportshylarǵa arnalǵan saýyqtyrý dıspanseri ashylady
NUR-SULTAN. QazAqparat – Bıyl Nur-Sultan qalasynda sporshylarǵa arnalǵan dene shynyqtyrý-saýyqtyrý dıspanseri ashylady. Bul týraly qalalyq Dene shynyqtyrý jáne sport basqarmasynyń basshysy Samat Erǵalıev málim etti, dep habarlaıdy QazAqparat.
«Búgin Nur-Sultan qalasynyń maslıhatynda elordanyń atqarýshy organdary jumysynyń negizgi mindetteri men baǵyttary boıynsha turaqty komıssııanyń otyrysy ótti. Jıyn barysynda Dene shynyqtyrý jáne sport basqarmasymen atqarylǵan jumystardy baıandadym. 2020 jyly elordada sportshylarǵa beriletin tólemaqy men ony alatyn sportshylardyń da sany artty. Sonymen qatar bıyldan bastap jattyqtyrýshylardyń jalaqysy 50 paıyzǵa kóterildi», - dep jazdy S. Erǵalıev Facebook-tegi paraqshasynda.
Sondaı-aq, basqarma basshysy bıyl elordada sportshylarǵa arnalǵan jańa keshenniń paıda bolatynyn alǵa tartty.
«Bıyl elordamyzda tuńǵysh ret sportshylarǵa arnalǵan «Dene shynyqtyrý jáne saýyqtyrý» dıspanseri ashylady. Sportshylardyń densaýlyǵyn baqylaýda ustaýdy qamtamasyz etý úshin bilikti sport dárigerlerin de tartý qolǵa alynady», - deıdi ol.
