Elordada spıdkýbıngten Azııa chempıonaty ótedi
NUR-SULTAN. QazAqparat – Elimizde alǵash ret spıdkýbıngten Azııa chempıonaty ótpek, dep habarlaıdy QazAqparat tilshisi.
Atalǵan sport túrinen Azııa chempıonaty 2 jylda bir ótedi. Jarysty ótkizetin el baıqaý arqyly anyqtalady.
Bıyl spıdkýbıngten Azııa chempıonatyn ótkizý qurmeti Ortalyq Azııa elderi arasynda alǵash Qazaqstanǵa buıyryp tur. Sondaı-aq, atalǵan sporttyq báseke TMD elderi arasynda da tuńǵysh ótkeli tur.
Sondaı-aq, uıymdastyrýshylardyń aıtýynsha, chempıonat aıasynda rýbık tekshesin (kýbık rýbık) qurastyrýshy sheberler álemge tanymal jerlesterimiz ánshi Dımash Qudaıbergen men boksshy Gennadıı Golovkınniń keskinin qurastyryp shyǵady.
«Nur-Sultan qalasynda ótetin spıdkýbıng chempoınaty 4 kúnge sozylady. Jarysta Azııanyń úzdikterin anyqtaıtyn bolamyz. Jeńimpazdar jarys sońynda belgili bolady. Úmitkerler 17 tártip boıynsha saıysqa túsedi. Synaq klassıkalyq túrden bastaý alyp, kezeń saıyn qıyndaı túsedi», - dedi Qazaqstan spıdkýbıng federatsııasynyń prezıdenti Arman Máshimov chempıonatty ótkizýge oraı ótken baspasóz máslıhatynda.
Sondaı-aq, qaýymdastyq basshysy elimizde spıdkýbıngti ıntellektýaldy sporttyq baǵyt retinde damytý kerektigin aıtyp otyr.
Atalǵan sporttyq báseke elordada erteń bastalady. Chempıonatqa 13 elden 18-20 jas aralyǵyndaǵy 116 sportshy qatyspaq.
Aıta ketsek, spıdkýbıngten Azııa chempıonatynyń kýbogi «Báıterek» tárizdes bolady. Sonymen qatar jeńimpazdarǵa dúnıejúzilik spıdkýbıng qaýymdastyǵynyń (World Cube Association) medali tabystalmaq. Saıystyń jalpy júlde qory 9 myń AQSh dollaryn quraıdy.
