Elordada Sotqa deıingi tatýlasý ortalyǵy ashyldy
NUR-SULTAN. QazAqparat - Elordada Tatýlasý ortalyǵy ashyldy, dep habarlaıdy QazAqparat qalalyq sottyń baspasóz qyzmetine silteme jasap.
Ortalyq jumysyn qalalyq sot pen qala ákimdigi iske qosyp otyr. Ol daýlardy sotqa deıin retteý ınstıtýtyn jetildirýge jáne jarııa etýge baǵyttalǵan.
Ortalyqty saltanatty túrde ashýǵa Nur-Sultan qalalyq sotynyń tóraǵasy Tilektes Bárpibaev, Qazaqstan Respýblıkasy Joǵarǵy sotynyń janyndaǵy Sottardyń qyzmetin qamtamasyz etý departamentiniń basshysy Naıl Ahmetzakırov, sýdıalar, Kásipkerler palatasynyń, qurylys kesheni jáne turǵyn úı-kommýnaldyq sharýashylyq qyzmetkerleri kásipodaǵynyń, PIK ókilderi qatysty.
«Sot praktıkasy kórsetip otyrǵandaı, daýlardyń kópshiligi eńbek, neke jáne otbasy, turǵyn úı jáne zalaldy óteýge qatysty bolyp otyr. Osyndaı daý-damaılar sotqa jetpeı sheshilýi múmkin», - dedi T. Bárpibaev.
N. Ahmetzakırov Ortalyqtyń ashylýyn elorda turǵyndary úshin aıtýly oqıǵa dep atady. Ol Elbasynyń medıatsııa ınstıtýtyn jetildirý boıynsha mindetter júktep otyrǵanyn atap kórsetti. «Kez kelgen adam osy jerde medıatorlardyń qyzmetin tegin paıdalana alady. Ortalyq adamdardyń túıtkildi máselelerin sheshýde qazirgi zamanǵy tehnologııany qoldanýda. Al halyq sottardy aralap áýre bolmaı, óz máselelerin sheshýge múmkindik alady», - dedi ol.
Ortalyq «bir tereze» qaǵıdatymen qyzmetter kórsetýge negizdelgen. Munda sottarǵa balama retinde medıatsııalyq kelisimderdi jasasý jóninde halyqqa keshendi qyzmet kórsetiletin bolady. Taraptardy tatýlastyrý úshin barlyq jaǵdaılar jasalǵan. Mundaǵy qolaıly ahýal jarasymdy áńgime-dúken quryp, ózara tıimdi sheshim qabyldaýǵa múmkindik beredi. Al balalar úshin osy jerde oıyn alańy da uıymdastyrylǵan.
«Bul jerde ótinishtiń sıpatyn, daýdyń sanatyn, problemaly máselelerdi retteý tásilderin anyqtaýdan, medıatorlardy tańdaýdan bastap medıatsııalyq kelisim jasaýǵa deıingi tıisti kómek kórsetiletin bolady. Sonymen qatar Ortalyq daýdy tez bitirýge, adamdardyń máselelerdi sheshýdegi mádenıetin arttyrýǵa, moraldyq jáne materıaldyq aýyrtpalyqty, qoǵam ishindegi quqyqbuzýshylyqtar men janjaldy jaǵdaılardy azaıtýǵa múmkindik beredi», - dedi sottan.
