Elordada sot júıesindegi kadrlyq saıasat talqylanyp jatyr

NUR-SULTAN. QazAqparat – Elordada QR Joǵary sot keńesiniń uıymdastyrýymen «Sot júıesindegi kadrlyq saıasattyń bolashaǵy» dep atalatyn halyqaralyq dóńgelek ústel ótip jatyr, dep habarlaıdy QazAqparat tilshisi.

Jıynnyń ashylýynda sóz sóılegen QR Prezıdenti Ákimshiligi basshysynyń orynbasary Álııa Raqysheva zań ústemdigin qamtamasyz etý Ult josparynda belgilengen el damýynyń basty basymdyqtarynyń biri ekendigin atap ótti. Sondyqtan sot salasynda júrgizilip otyrǵan reforma birinshi kezekte kadr máselesine jáne onyń nátıjesinde sýdıalardy irikteý men sottardaǵy tıisti laýazymdarǵa taǵaıyndaýǵa baılanysty sot júıesin jetildirý tetikterine basty nazar aýdarylǵandyǵyn aıtty.

«Osy jyldyń aqpan aıynda Memleket basshysynyń bastamasymen sýdıa kadrlaryn sapaly jańartýǵa baǵyttalǵan zańdar qabyldandy. Qol qoıylǵan sátten bastap zańdy Joǵary sot keńesi men Joǵarǵy sot belsendi túrde iske asyrýda. Osyǵan baılanysty shet elderdiń tájirıbelerin zertteý jáne taldaý, tájirıbe almasý, sýdıa jumysyna barlyq talaptarǵa jaýap beretin mamandardy irikteý júıesin odan ary jańǵyrtý boıynsha tıisti usynystar ázirleý úshin halyqaralyq sarapshylardyń qatysýymen ótip jatqan búgingi dóńgelek ústeldiń qundylyǵy mańyzdy», - dedi Álııa Raqysheva.

QR Joǵarǵy soty, QR Ádilet mınıstrligi, BUU Damý baǵdarlamasynyń keńsesi birlesip uıymdastyrǵan bas qosýǵa otandyq jáne sheteldik sarapshylar, birqatar memlekettik organnyń, sot qoǵamdastyǵynyń ókilderi, Parlament depýtattary qatysyp otyr. Sharanyń maqsaty – sot kadrlaryn irikteý, daıarlaý jáne ilgeriletý júıesin úzdik halyqaralyq tájirıbeler men EQYU standarttar negizinde jańa ádistemelermen talqylaý.