Elordada sot tájirıbesiniń monıtorıngi jónindegi respýblıkalyq eksperttik komıssııanyń birinshi otyrysy ótti
ASTANA. 28 sáýir. QazAqparat /Marlan Jıembaı/ - Búgin «Nur Otan» HDP Ortalyq apparatynda QR Parlamenti Senatynyń depýtaty Oralbaı Ábdikárimovtiń tóraǵalyǵymen sot tájirıbesiniń monıtorıngi jónindegi respýblıkalyq eksperttik komıssııanyń birinshi otyrysy ótti.
Alqaly jıyn barysynda komıssııa músheleri qazirgi tańda qazaqstandyq qoǵamnyń memleketke jáne onyń organdaryna degen senimniń nyǵaıý úrdisi kóbine sot júıesindegi sot ádildigine baılanysty bolatyndyǵyn biletindikterin atap ótti. Olardyń paıymynsha, sot júıesinde júrgizilip jatqan reformalar memlekettiń ımıdjine oń áserin berýde. Degenmen, sot júıesinde sheshimin tappaǵan kúrdeli máseleler de jetkilikti.
Máselen, 2009-2010 jyldary aralyǵynda sottardyń jemqorlyǵyna baılanysty 11 qylmystyq is qozǵalǵan. Al aǵymdaǵy jyly zańda belgilengen talaptardy saqtamaǵany úshin Joǵarǵy sottyń 6 sýdıasy laýazymynan bosatyldy.
Mundaı jaǵdaı sot qyzmeti ashyqtyǵynyń jáne olardyń qyzmetine qoǵamdyq baqylaý júrgizýdiń tıimdi tetikteriniń bolmaýynan qalyptasyp otyr.
Aıta keteıik, atalǵan komıssııanyń quramyna «Ádilet» partııasynyń, «Atameken» palatasynyń, Úkimettik emes uıymdardyń ókilderi, ǵalym-zańgerler jáne QR Joǵarǵy sotynyń otstavkadaǵy sýdıalary kiredi.
