Elordada sorǵy-súzgi stansasy jumysyn bastaıdy

NUR-SULTAN. QazAqparat – Búginde elordada úshinshi sorǵy-súzgi stansasynyń qurylysy júrip jatyr, bul nysan jyl sońyna qaraı jumysyn bastaıdy. Bul týraly Nur-Sultan qalasynyń ákimi Altaı Kólginov málim etti, dep habarlaıdy QazAqparat tilshisi.

«Jyl sanap qalanyń ósý dınamıkasyn eskere otyryp, aldymen jylý, elektr, sý berý qýatyn arttyrý qajet. Turǵyndardyń ómir súrý jaılylyǵy, qalanyń damýy, ınvestıtsııa tartý atalǵan faktorlarmen tikeleı baılanysty. Memleket basshysynyń tapsyrmasy boıynsha osy máselelerdi sheshý úshin birqatar strategııalyq nysandardyń qurylysyn júrgizip jatyrmyz. Mysaly, sýǵa qatysty máselelerdi sheshý úshin ótken jyly sorǵy-súzgi stansasynyń (SSS-3) qurylysyna kiristik. Nysan osy jyldyń sońyna qaraı ishinara paıdalanýǵa beriledi», - dedi Altaı Kólginov qalalyq máslıhattyń kezekten tys sessııasynda.

Ákimniń aıtýynsha, 2023 jyldan bastap atalǵan nysannyń qýaty ulǵaıa túsedi.

«Jańa sorǵy-súzgi stansasy qurylys alańdaryn aýyzsýmen qamtamasyz etip qana qoımaı, sý berý qýatyn arttyrýǵa múmkindik beredi. Máselen, qazir táýligine 300 myń tekshe metr sý tutynatyn bolsaq, jańa stansa táýligine qosymsha 100 myń tekshe metrden astam sý óndiredi. Sondaı-aq, SSS-3-ke uzyndyǵy 18 shaqyrymdy quraıtyn sý burǵyshyn salamyz», – deıdi ol.

Eske sala ketsek, elordada úshinshi sorǵy-súzgi stansasynyń qurylysy bastalatyny ótken jyly aıtylǵan edi. Buǵan deıin qala basshysy gazben jylytý qazandyqtary iske qosylatynyn málim etti.