Elordada sońǵy úsh kúnde koronavırýspen aýyrǵandar sany 2 ese ósti
NUR-SULTAN. QazAqaparat – Sońǵy úsh kúnde Nur-Sultan qalasynda koronavırýsqa qatysty jaǵdaı kúrt nasharlady. Bul týraly Ortalyq kommýnıkatsııalar qyzmetinde ótken brıfıngide aıtyldy, dep habarlaıdy QazAqparat tilshisi.
Búgin Ortalyq kommýnıkatsııalar qyzmetinde «Nur-Sultan qalasyndaǵy epıdemıologııalyq jaǵdaı jáne medıtsınalyq uıymdardyń koronavırýs ınfektsııamen kúresýge daıyndyǵy» taqyrybynda brıfıng ótti.
«Sońǵy úsh kúnde Nur-Sultan qalasynda Covid-19 boıynsha jaǵdaı kúrt nasharlady. Osy kúnderi aýyrǵandar sany 2 ese ósti. 100 myń turǵynǵa shaqqandaǵy aýrýshańdyq respýblıka deńgeıinen 2,9 ese joǵary kórsetkishke ıe boldy. Búgingi kúni epıdemıologııalyq jaǵdaı kúrdeli», - deıdi Sanıtarlyq-epıdemıologııalyq baqylaý departamentiniń basshysy, Nur-Sultan qalasynyń bas sanıtarlyq dárigeri Sarhat Beısenova.
Onyń aıtýynsha, qala 20 kúnnen beri epıdemıologııalyq jaǵdaıdy baǵalaý matrıtsasy boıynsha «qyzyl aımaqta» tur.
«Kúnine koronavırýspen aýyrǵan 350-400 jaǵdaı tirkelýde. Jyl basynan beri elordada koronavırýspen aýyrǵandardyń sany 11 myńnan asty. Pandemııa bastalǵaly beri 30 myńnan astam jaǵdaı tirkeldi. Syrqattanýshylyq dınamıkasy boıynsha aqpanda qańtarmen salystyrǵanda 25%-ǵa jaǵdaıdyń tirkelýi tómendegeni baıqaldy, sońǵy aptada syrqattanýshylyqtyń ósýi esebinen naýryz aıynda qańtarmen salystyrǵanda 1,1 esege artqany baıqalady (qańtar – 3 763; aqpan - 2 811; naýryz - 4 939). Qańtar aıynda sońǵy jarty jyldaǵy eń joǵary syrqattanýshylyq tirkelgenin atap aıtamyz. Táýligine 346 bastapqy jaǵdaı tirkelgen (sımptomdary bar 231 jaǵdaı, 115 sımptomsyz jaǵdaı)», - deıdi ol.
