Elordada sońǵy 5 aıda turmystyq qylmys azaıdy

NUR-SULTAN. QazAqparat - Nur-Sultanda turmystyq zorlyq-zombylyq tómendep, qylmystyń ashylý kórsetkishi jaqsardy. Sońǵy 5 aıdyń qorytyndysy boıynsha qylmystardy tirkeý shamamen 40%-ǵa tómendedi. Bul týraly Nur-Sultan qalasy Polıtsııa departamentiniń jergilikti polıtsııa qyzmetiniń bastyǵy Arman Aıtmaǵambetov málim etti, dep habarlaıdy qala ákimdiginiń resmı saıty.

Oyń aıtýynsha aldyn alý jumystarynyń kúsheıýi nátıjesinde mas kúıindegi qylmystar 37,7%-ǵa tómendegen. Qylmys deńgeıi 10 myń turǵynǵa shaqqanda 40,2%-ǵa azaıdy.

«Pandemııa jaǵdaıynda halyqtyń ómir salty túbegeıli ózgerdi. Áleýmettik baılanystardyń tómendeýi, qarjylyq jaǵdaıdyń nasharlaýy adamdardyń psıhologııalyq jaǵdaıyna teris áser etti. Maskúnemdik saldarynan otbasylyq jáne ózge adamdarmen qaqtyǵystar týyndady. Biz esepte turǵandarmen (maskúnemder – 1 081, nashaqorlar – 400, otbasylyq janjaldar – 3388) profılaktıkany kúsheıttik, maskúnemdik (183) jáne nashaqorlyq (72) baǵyty boıynsha jumysty jalǵastyrýdamyz», - dep málimdedi Arman Aıtmaǵambetov.

Onyń aıtýynsha turmystyq quqyq buzýshylyqtar úshin 849 adam jaýapqa tartyldy, jábirlenýshilerdi qorǵaý úshin 3388 qorǵaý uıǵarymy shyǵaryldy, 275 áıel daǵdarys ortalyǵyna ornalastyryldy. Otbasylyq janjaldar boıynsha 102 nómirine túsken qońyraýlardy óńdeý tájirıbesi engizildi. Osylaısha, ýchaskelik ınspektorlardyń jumysyna baqylaý kúsheıtildi.

«Azamattyq bastamalardy qoldaý ortalyǵymen birlesip turmystyq zorlyq-zombylyqtan zardap shekken jáne problemaly otbasylarǵa quqyqtyq jáne psıhologııalyq kómek kórsetiledi. 203 adamnyń júris-turysyna erekshe talaptar belgilengen, onyń ishinde 160-y alkogoldik ishimdikterdi paıdalanýǵa tyıym salynǵan. Minez-qulqyna baılanysty qoıylǵan erekshe talaptardy buzǵany úshin 203 adam jaýapqa tartyldy», - dedi vedomstvo basshysy.

Sóz sońynda Arman Aıtmaǵambetov áıelderdiń quqyqtary men zańdy múddelerin qorǵaý máseleleri Memleket basshysynyń baqylaýynda ekenin aıtty. Bul týraly Qasym-Jomart Toqaev Qazaqstan halqyna Joldaýynda málimdegen bolatyn.