Elordada sońǵy 3 jylda 12 bala terezeden qulap, kóz jumǵan
NUR-SULTAN. QazAqparat - Elordada kópqabatty úılerdiń terezesinen balalardyń qulap ketpeýiniń aldyn alý sharalary uıymdastyryldy. QR TJD qyzmetkerleri Nur-Sultan qalasyndaǵy turǵyn úılerge qaýipsizdik sharasyn saqtaý týraly aqparattyq kitapsha taratty, dep habarlaıdy QazAqparat tilshisi.
«Sońǵy kezderi kópqabatty úılerdiń terezesinen balalardyń qulaýy oryn alyp otyr. Sońǵy 3 jyldaǵy statıstıkaǵa qaraıtyn bolsaq, búgingi tańǵa deıin 46 bala terezeden qulasa, onyń 12-si kóz jumǵan», - deıdi Nur-Sultan qalasy Tótenshe jaǵdaılar departamentiniń bastyǵy Baýyrjan Syzdyqov.
Onyń aıtýynsha, bıyl 19 naýryz ben 8 mamyr aralyǵynda balalardyń 4 bala terezeden qulap ketken.
«Bıyl balalardyń terezeden qulaý oqıǵasy tórt ret boldy. Onyń ishinde bireýi qaza boldy. Qalǵan úsh bala aýrýhaǵana jatqyzyldy. Nur-Sultan qalasy turǵyndary men qonaqtary terezede tejegishterdiń bolmaýyna nazar aýdarýy kerek. Balalardy qaraýsyz qaldyrýǵa bolmaıdy. Qazir kópqabatty úılerdiń aýlalarynda aqparattandyrý júrgizip, áleýmettik jelilerde qaýipsizdik sharalaryn oryndaý týraly usynystar berildi. Osy týraly vıdeorolıkter daıyndap, qaýipsizdik sharalaryn saqtaý týraly aqparattyq kitapsha taratýdamyz. Biz elordadaǵy barlyq turǵyn úılerge baryp, túsindirý jumystaryn júrgizýdi josparlap otyrmyz», - deıdi ol.
Sondaı-aq, ol balalardyń terezege shyǵyp ketpeýi úshin qandaı sharalardy qolǵa alý kerektigin aıtty.
«Tereze aldyna oryndyq, dıvan sııaqty jıhazdardy qoımaýǵa tyrysý kerek. Bala bul zattar arqyly terezege shyǵyp ketedi. Bala terezedegi moskıt setkasyn ustap, sonymen qosa jerge qulap ketedi. Moskıt setka balany qulap ketýden qorǵamaıdy, sondyqtan terezege armatýradan jasalǵan tor ornatýǵa bolady.
