Elordada Soltústik Qazaqstan oblysynyń aýyl sharýashylyq jármeńkesi ótip jatyr
ASTANA. 26 qazan. QazAqparat - El astanasynda yntymaǵy jarasqan halyq yrysty jármeńkege asyǵýda. Bul joly jomart kúzdiń jemisin Soltústik Qazaqstan oblysynyń 100 eń úzdik kásipkeri usyndy.
Sapasy men baǵasy úılesken aýyl sharýashylyq jármeńkesin oblys ákimi Samat Eskendirov, Astana qalasy máslıhatynyń hatshysy Sansyzbaı Esilov aralap kórip, dıqandar ónimine ózindik baǵa berdi, dep habarlady astana.kz saıty.
«Byltyr oblysta ónim jaqsy bolǵan. Bıylǵy jıyn odan da jaqsy kórsetkishke qol jetkizdik. Sondyqtan ákelgen ónimimiz de kóbirek boldy. Jalpy alǵanda 1,5 myń tonna taýar ákeldik. Onyń ishinde kartop 150 tonna, et 70 tonnadan astam. Kókónis te jetkilikti», - dedi Soltústik Qazaqstan oblysynyń ákimi Samat Eskendirov.
Jármeńkege Petropavl qalasy men oblysqa qarasty 13 aýdan túgeldeı qatysty. Bul óńirlerden kelgen kásipkerler elordaǵa 1000 tonnadan astam ónim ákelgen. Ortalyq alańda qurylǵan 86 saýda shatyrynan kartop, balyq, et ónimderi, un ónimderi men basqa da qajetti azyq túrin tabasyz.
Jıyn-terin bolatyn, qambaǵa astyq tolatyn shaqta elorda turǵyndary da aýyl sharýashylyq ónimderin tıimdi baǵamen qap-qap qyp áketip jatty. Sondaı-aq, jármeńkege kelýshiler oblystyń shyǵarmashylyq uıymdary usynǵan kontserttik baǵdarlamany tamashalady.
