Elordada soǵys batyrlary beınelengen bılbordtar ilindi

NUR-SULTAN. QazAqparat – Elorda Uly Jeńistiń mereıtoıy qarsańynda túrlene tústi, 9 mamyr kúni Uly Jeńistiń 75 jyldyǵy ólsheýsiz dańqtyń, óshpes qaharmandyq erliktiń, halqymyzdyń sheksiz, muqalmas qaıratynyń merekesi retinde atap ótiledi, dep habarlaıdy QazAqparat.

Uly Jeńis kúni beıbitshilikti súıgish barsha adamzattyń merekesi. Búgingi jeńimpaz urpaqtyń balalary men nemereleri úshin jarqyn da qasıetti mereke. Qala kóshelerinde ádettegideı halyq kóp emes, degenmen elorda úlken mereke qarsańynda ekeni ańǵarylady.

Merekelik rámizder barlyq jerde: jalaýshalar men Jeńis kúniniń belgileri jazylǵan kóptegen plakattar ilinip, aıaldama pavılondarynda Otan qorǵaýshylar kúnimen jáne 9 mamyr merekesimen quttyqtaýlar ilýli tur.

Sońǵy jyldary qalyptasqan dástúr boıynsha, ortalyq dańǵyldardyń boıynda ekinshi dúnıejúzilik soǵysynyń batyrlary beınelengen bılbordtar ilingen. Qazir kózi tiri qyryq tórt soǵys ardageri bar. Olardyń eń jasy toqsannan asqan. Soǵys jyldary sol kezdegi Aqmola oblysynan 14 723 adam attanyp, olardyń jartysyna jýyǵy maıdan dalasynda qaza tapty. Bizdiń atalarymyz shaıqasta teńdesi joq erlikterimen erekshelenip, 44 jaýynger Sovet Odaǵynyń Batyry ataǵyna ıe boldy. Eki márte Keńes Odaǵynyń Batyry, ushqysh Talǵat Begeldınov, Sovet Odaǵynyń Batyry, táýelsiz Qazaqstannyń birinshi qorǵanys mınıstri Saǵadat Nurmaǵambetov, Reıhstag ústinde Jeńis týyn kótergen alǵashqy Halyq Qaharmany Raqymjan Qoshqarbaevtar Saryarqa dańqyn búkil álemge jaıdy. Solardyń jáne basqa maıdangerlerdiń, sondaı-aq tyl eńbekkerleriniń estelikteri keshe ǵana jaryq kórgen «Uly Jeńis eshqashan umytylmaıdy» kitabynda jınaqtalǵan. Jeńistiń 75 jyldyǵy otshashý, saltanatty sherýlersiz ótedi. Biz bul qasıetti merekeni úıde, otbasynda atap ótip, bizge beıbit aspan syılaǵan ákelerimizdi, atalarymyzdy eske alamyz.