Elordada soǵys ardagerlerine 1 mln teńgeden qarjylaı kómek beriledi
NUR-SULTAN. QazAqparat - Elordada ekinshi dúnıejúzilik soǵys ardagerlerine 1 mln teńge kóleminde qarjylaı kómek beriledi. Bul týraly QazAqparat ákimdikke silteme jasap habarlaıdy.
Nur-Sultanda qazirgi ýaqytta ekinshi dúnıejúzilik soǵysynyń 25 ardageri turady.
Sonymen qatar basqa memleketterdiń aýmaǵyndaǵy urys qımyldarynyń ardagerlerine, ıaǵnı Tájikstan-Aýǵanstan ýchaskesinde Táýelsiz Memleketter Dostastyǵynyń shekarasyn qorǵaýǵa qatysqan áskerı qyzmetshilerge, Iraktaǵy halyqaralyq bitimgershilik operatsııaǵa bitimger retinde qatysqan Qazaqstan Respýblıkasynyń áskerı qyzmetshilerine, Taýly Qarabaqtaǵy etnosaralyq qaqtyǵysty retteýge qatysqan áskerı qyzmetshilerge, sondaı-aq burynǵy KSR Odaǵy ishki ister jáne memlekettik qaýipsizdik organdarynyń basshy jáne qatardaǵy quramynyń ókilderine 20 AEK (58 340 teńge) kóleminde (708 adam) tólem jasalady.
Sol sııaqty jeńildikter boıynsha ekinshi dúnıejúzilik soǵysynyń ardagerlerine teńestirilgenderge, naqtyraq aıtqanda ekinshi dúnıejúzilik soǵys kezinde qyzmet etken áskerı qyzmetkerlerge, fashıstik Germanııaǵa qarsy soǵys qımyldaryna qatysqan adamdarǵa, Lenıngrad qalasyndaǵy blokada kezinde jumys istegen azamattarǵa, kontslagerlerdegi, gettolardaǵy jáne basqa da májbúrlep ustaý oryndaryndaǵy kámeletke tolmaǵan tutqyndarǵa, áskerı maqsattaǵy obektilerdegi basqa da radıatsııalyq apattar men avarııalardyń, ıadrolyq synaqtardyń saldarynan múgedek bolǵan adamdarǵa jáne múgedektigi ata-anasynyń biriniń radıatsııalyq sáýle alýynan zııan shekken balalary sekildi azamattarǵa 35 AEK (102 095 teńge) kóleminde (415 adam) tólem jasalady.
Budan bólek, eńbek ardagerleri, «Ardagerler týraly» Qazaqstan Respýblıkasynyń Zańyna sáıkes basqa da adamdarǵa, ıaǵnı Sotsıalıstik Eńbek Erleri, úsh dárejeli Dańq, úsh dárejeli Eńbek Dańqy ordenderiniń ıegerlerine, «Qazaqstannyń Eńbek Eri» ataǵyna ıe bolǵan adamdarǵa, 1941 jylǵy 22 maýsym – 1945 jylǵy 9 mamyr aralyǵynda keminde alty aı jumys istegen (qyzmet ótkergen) jáne ekinshi dúnıejúzilik soǵysy jyldarynda tyldaǵy qajyrly eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen nagradtalmaǵan adamdarǵa, tyl ardagerlerine, qaza tapqan áskerı qyzmetshilerdiń otbasylaryna, Uly Otan soǵysynda qaıtys bolǵandardyń áıeline 11 AEK (32 087 teńge) kóleminde (2695 adam) tólem jasalady.
Barlyǵy 3843 adamǵa 195 159 583 teńge tóleý josparlanyp otyr.
