Elordada Slovenııa Prezıdentiniń bastamasymen sýret kórmesi ótedi
ASTANA. KAZINFORM — Slovenııa Prezıdentiniń bastamasymen elordadaǵy mektepterdiń birinde «Jas bal aralary beıbitshilikti jaqtaıdy» taqyryby boıynsha sýret kórmesi ótedi.
Bul týraly Aqordada elimizge resmı saparmen kelgen Slovenııa Prezıdenti Natasha Pırts-Mýsarmen kelissózderden keıingi BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev atty.
— Erteń Slovenııa Prezıdentiniń bastamasymen elordadaǵy mektepterdiń birinde «Jas bal aralary beıbitshilikti jaqtaıdy» taqyryby boıynsha sýret kórmesi ótedi. Ózderińizge málim, Slovenııanyń qorshaǵan ortany qorǵaýǵa qatysty bastamasyn BUU-nyń Bas assambleıasy da qoldady. 20 mamyr Dúnıejúzilik bal aralary kúni bolyp belgilendi. Eki eldiń oqýshylaryn halyqaralyq deńgeıdegi osyndaı jobalarǵa tartý ekologııa jáne mádenıet salasyndaǵy yntymaqtastyqty kúsheıtedi dep senemin, — dedi Qasym-Jomart Toqaev.
Memleket basshysy ózekti halyqaralyq jáne aımaqtyq máseleler de nazardan tys qalmaǵanyn bas aıtty.
— Qazaqstan men Slovenııa arasynda jahandyq deńgeıde tyǵyz baılanys ornaǵan. Kóptegen ózekti másele boıynsha ustanymdarymyz ortaq. Qazir geosaıası jaǵdaı óte kúrdeli. Prezıdent Pırts-Mýsar ekeýimiz álemdegi qaqtyǵystardy BUU jarǵysy men halyqaralyq quqyq qaǵıdattaryna saı beıbit jolmen sheshý qajet ekenin quptadyq. Kópjaqty qurylymdar aıasynda yqpaldastyqty odan ary kúsheıtýge múddeli ekendigimizdi rastadyq, — dedi Prezıdent.
Osy oraıda Qasym-Jomart Toqaev Almatyda Ortalyq Azııa men Aýǵanstan úshin ornyqty damý maqsattary jónindegi BUU-nyń aımaqtyq ortalyǵyn ashý týraly bastamany qoldaǵany úshin Slovenııa tarapynan rızashylyǵyn bildirgenin aıtty.
— Jalpy, búgingi kelissózder jemisti boldy dep kúmánsiz aıtýǵa bolady. Osy sapardyń nátıjesinde qazaq-sloven yqpaldastyǵy nyǵaıyp, jańa deńgeıge kóteriledi dep senemin. Birlesken kúsh-jigerimizdiń arqasynda biz ortaq maqsattarǵa qol jetkizemiz, — dedi Memleket basshysy.
Buǵan deıin Memleket basshysy Qazaqstan-Slovenııa bıznes keńesin qurýdy usynǵan edi.