Elordada skeıt alańy jáne parkýr keńistigi paıda bolady
NUR-SULTAN. QazAqparat - Nur-Sultan qalasyndaǵy «Arqar» kópiriniń astynda skeıt alańy men parkýr aımaǵy ashylady. Bul týraly bas qaladaǵy Ýrbanıstıka ortalyǵynyń basshysy Elnar Bazyken málim etti, dep habarlaıdy QazAqparat tilshisi.
«Biz búginde qaladaǵy kópirler astyndaǵy alańdardy qajettilikke jaratyp jatyrmyz. Onda adamdarǵa demalyp qana qoımaı, ózderin qyzyqtyratyn sport túrlerimen aınalysýyna múmkindik jasalady. Sonyń ishinde bizdiń josparǵa sáıkes «Arqar« kópiriniń astynda skeıt alańy jáne parkýr keńistigi ashylady. ıAǵnı ekstremaldy sport túrlerine arnalǵan keńistik paıda bolady. Jobanyń qurylysy osy kúzde bastalyp, keler jylǵa daıyn bolmaq», - dedi E. Bazyken.
Onyń aıtýynsha, keńistiktiń jalpy aýmaǵy 1600 tekshe metrdi quraıdy jáne atalǵan joba «Nur-Sultan - jaıly qala» sheberlik-josparynyń aıasynda júzege asyrylady.
Eske sala ketsek, osy jazda «Arqar» kópiriniń astynda art-keńistik ashylyp, qala turǵyndary men qonaqtary úshin kórikti oryndardyń birine aınaldy.
