Elordada «Sisterhood Power» tegin bıznes-tálimgerlik baǵdarlamasy iske qosyldy
Astanada Qazaqstannyń túkpir-túkpirinen kelgen kásipkerlerge arnalǵan «Sisterhood Power» bıznes-tálimgerliktiń arnaıy baǵdarlamasyn iske qosý boıynsha baspasóz konferentsııasy ótti, dep habarlaıdy Kazinform.
Jobanyń basty maqsaty – bıznesti damytý jáne keńeıtýge arnalǵan bilim jáne quraldardy berý, áıelderge kóshbasshylyq daǵdylardy damytýǵa kómektesý jáne aımaqtyq áıelder bıznes qaýymdastyqtaryn qoldaý. Oqý baǵdarlamasy onlaın rejımde ótedi jáne irikteýden ótken qatysýshylar úshin tegin bolady. Baǵdarlama boıynsha bıznestegi áıelderdi oqytý jáne olarǵa tálimger bolý josparlanyp otyr. Áıelder óz kezeginde óz óńirlerinde bıznesti jańa bastaǵan kásipkerlermen tájirıbe almasady. Baǵdarlama AQSh-tyń Qazaqstandaǵy Elshiliginiń qoldaýymen júzege asyrylady.
AQSh-tyń Qazaqstandaǵy Elshiliginiń qoǵamdyq dıplomatııa bóliminiń basshysy Debra Lo kóp jyldar boıy AQSh-tyń dıplomatııalyq mıssııasy Qazaqstannyń áıelder quqyqtary men múmkindikterin keńeıtý jónindegi birqatar bastamasyna qoldaý kórsetip kele jatqanyn aıtty.
«Biz osy baǵdarlamaǵa qatysýshylarǵa tájirıbelerin shyńdap, óz kásiporyndaryn damytýǵa kómektesedi dep senemiz. Sebebi olar, ıaǵnı áıelder eldiń bolashaq ekonomıkalyq ósýiniń qozǵaýshy kúshi ekenin aıtqan jón», - dedi Debra Lo.
«Sisterhood Power» bıznes-tálimgerlik baǵdarlamasynyń bas uıymdastyrýshysy, áleýmettik kásipker, Áleýmettik ınnovatorlar qaýymdastyǵynyń basqarma múshesi Lázzat Alshynova bul baǵdarlama Qazaqstannyń barlyq óńirindegi kásipkerlerdiń qyzyǵýshylyǵyn týdyrǵanyn aıty.
«Jalpy alǵanda, biz 200-ge jýyq ótinim tirkedik. Olardyń ishinde óndiristen bastap qyzmet kórsetý salasyna deıin bıznestiń túrli salalaryn qamtıtyn 49 qatysýshynyń ótinimi irikteldi.
Bizdiń baǵdarlamada oqytý protsesi barynsha tıimdi jáne qoljetimdi. Máselen, kásipkerler basqarý, marketıng jáne tabysty bıznes-modelderdi qurý strategııalarymen tanysatyn bolady. Sisterhood Power – bul jaı ǵana baǵdarlama emes, bul ıdeıalar shyndyqqa aınalatyn múmkindikter keńistigi. Biz uıymdastyrýshylar men tálimgerler retinde áıelderdi biriktirýge jáne olardyń bıznes maqsattaryna jetýge kómektesýge tyrysamyz», - dedi ol.
«Sisterhood Power» bıznes-tálimgerlik baǵdarlamasynyń tálimgeri, kásipker, Qazaqstan áıelder kúshteri alıansy tóraǵasynyń orynbasary Baıan Toıkebaeva bul baǵdarlama boıynsha óz aımaǵynan eki kásipker ǵana tilimger bola alatynyn jetkizdi.
«Baǵdarlama 2 aı boıy tálimgerlik qoldaý jáne «teńbe-teń» baǵdarlamasyna qatysý bólimderinen turady, onda árbir qatysýshy óz aımaǵynan 2 kásipkerge tálimger bolady. Biz bir-birimizdi qoldap, kásipkerler betpe-bet keletin kedergilerdi joıyp, birge damıtyn bolamyz», - dep atap ótti B. Toıkebaeva.
