Elordada Sırııa máselesi boıynsha joǵary deńgeıdegi kezdesý ótedi

NUR-SULTAN. QazAqparat – 2021 jylǵy 7-8 shildede Nur-Sultan qalasynda Astana formatynda Sırııa boıynsha joǵary deńgeıdegi 16-shy halyqaralyq kezdesý ótedi. Bul týraly QazAqparat Syrtqy ister mınıstrligine silteme jasap habarlaıdy.

Aldaǵy kezdesýde kepilger elder - Iran, Reseı jáne Túrkııa, sondaı-aq Sırııanyń úkimeti men qarýly oppozıtsııasy ókilderiniń qatysýy josparlanýda. Baqylaýshylar retinde BUU, Iordanııa, Iraq pen Lıvannyń joǵary deńgeıdegi ókilderi qatysady.

Kelissózderdiń kún tártibine kelesi máseleler kiredi: Sırııadaǵy, onyń ishinde áleýmettik-ekonomıkalyq jáne sanıtarlyq-epıdemıologııalyq ahýal; Sırııaǵa halyqaralyq izgilik kómek kórsetý; Jenevadaǵy sırııalyq Konstıtýtsııalyq komıtet jumysynyń jandaný perspektıvalary; taraptar arasyndaǵy senimdi nyǵaıtý, onyń ishinde tutqyndarmen almasý, kepilge alynǵandardy bosatý jáne iz-tússiz joǵalǵandardy izdeý.

Kelissózderdiń birinshi kúni ekijaqty jáne kepilger elderdiń úshjaqty konsýltatsııalaryn, sırııalyq taraptarmen kelissózder, baqylaýshy taraptardyń delegatsııalarymen baılanystar , al ekinshi kúni konsýltatsııalardy jalǵastyrý jáne Jalpy otyrys ótkizý josparlanýda.

Sonymen qatar kepilger elderdiń, BUU jáne Halyqaralyq qyzyl krest komıteti sarapshylarynyń qatysýymen májbúrlep ustalyp otyrǵan tulǵalar boıynsha Jumys tobynyń kezekti otyrysy josparlanýda.