Elordada sırek kezdesetin ósimdikterge qatysty jaýapkershilik kúsheıtildi
ASTANA. QazAqparat – Astana qalasyn kógaldandyrý jáne jasyl jelekke bóleýdiń jańa qaǵıdalary ázirlendi. Bul týraly Astana qalasy qorshaǵan ortany qorǵaý jáne tabıǵatty paıdalaný basqarmasynyń basshysy Álııa Qojabaeva málim etti, dep habarlaıdy QazAqparat tilshisi.
Búgin basqarma basshysy qoǵamdyq keńes otyrysynda «Astana qalasynyń aýmaǵynda jasyl jelekterdi qurý, kútip-ustaý jáne qorǵaý qaǵıdalaryn bekitý týraly» joba máslıhat qaraýyna usynylatynyn aıtty.
Onyń aıtýynsha, atalǵan joba «Jergilikti memlekettik basqarý týraly» zańǵa jáne ekologııa, geologııa jáne tabıǵı resýrstar mınıstriniń buıryǵymen bekitilgen eldi mekenderdi jasyl jelekterdi qurýdyń, kútip – ustaýdyń jáne qorǵaýdyń úlgilik qaǵıdalaryna sáıkes ázirlendi.
«Osy iske buǵan deıin Indýstrııa jáne ınfraqurylymdyq damý mınıstrligi jaýapty bolǵan. Ótken jyldan bastap atalǵan fýnktsııa Ekologııa mınıstrligine berildi. Jańa joba talaptaryna kelsek, jasyl jelekti damytýdy ǵylymı uıymdardyń usynymdary negizinde elordanyń aýdandyq ákimdik apparattary júzege asyrady. Sondaı-aq, Astana qalasynyń bas josparyna sáıkes kógaldandyrý obektileri ortaq paıdalanylatyn jerlerde qurylady degen tolyqtyrý engizildi», - dedi Álııa Qojaeva qoǵamdyq keńes otyrysynda.
Basqarma basshysy aıtqan taǵy bir jańashyldyq, kógaldarda avtokólikti qoıýǵa tyıym salyndy.
«Sol sııaqty sırek kezdesetin jáne joıylyp ketý qaýpi bar ósimdikter men jasyl jelekterdi kesýge ýákiletti organnyń ruqsat berýine tyıym salyndy. Osylaısha aǵash jáne ósimdik túrlerin zańsyz kesý, olardy transplantatsııalaý boıynsha jaýapkershilik kúsheıtildi», - deıdi ol.
Sondaı-aq, elordany kógaldandyrý jobasy «Ashyq NQA» portalynda qoǵam talqysynan ótken.
Buǵan deıin habarlaǵanymyzdaı qoǵamdyq keńes aqyly avtoturaqtar máselesin de kóterdi. Talqylaý barysynda Astanada aqyly avtoturaqtardyń kirisiniń tek 5% ǵana bıýdjetke túsetini belgili boldy.
