Elordada sıntetıkalyq esirtki jetkizýdiń iri arnasy joıyldy

ASTANA.QazAqparat - Elordada esirtki qylmysyna qarsy kúres basqarmasynyń qyzmetkerleri asa iri kólemde esirtki satýdyń jolyn kesti, dep habarlaıdy QazAqparat Polisia.kz-ke silteme jasap.

Kúmisbekov kóshesindegi úıiniń janynan Range Rover avtokóliginiń júk salǵyshynda kúshti sıntetıkalyq esirtki zaty – mefedronnyń eki paketin tasymaldap kele jatqan 35 jastaǵy jergilikti turǵyn ustaldy.

Tergeý anyqtaǵandaı, ustalǵan azamat esirtkini Almatydan satyp alyp, kólikpen Astanaǵa jóneltip, ózi elordaǵa ushaqpen oralǵan. Ári qaraı ol esirtkini bir keliden bólip, Kókshetaý, Petropavl jáne Pavlodar qalalarynda iri mólsherde kóterme saýda úshin jasyryp ketýdi josparlaǵan. Kúdikti esirtkini orap-túıý úshin tasymaldaý barysynda ustaldy. Ustalǵannyń páterin tintý kezinde eki keli gashısh, bir mıllıonnan artyq teńge, sondaı-aq elektrondy tarazylar men býyp-túıýge arnalǵan materıaldar alyndy.

Іshki ister mınıstrliginde atap ótkendeı, tárkilengen esirtkiniń salmaǵy asa iri mólsherge jatady. Olardyń aınalymy úshin jaza múlki tárkilenip, 15 jylǵa deıin bas bostandyǵynan aıyrýdy kózdeıdi.

Qazirgi ýaqytta izdestirý sharalary jalǵasýda, ustalǵan azamattyń qylmystyq baılanystary anyqtalýda.

Foto: polisia.kz