Elordada ShYU memleketteri mádenıet mınıstrleriniń keńesi ótýde

ASTANA. QazAqparat - Elordada Shanhaı yntymaqtastyq uıymyna múshe memleketter mádenıet mınıstrleriniń 14-shi keńesi ótýde. Otyrys barysynda Qazaqstan, Iran, Qyrǵyzstan, Reseı, Tájikstan jáne Úndistannyń ókilderi uıym aıasyndaǵy mádenı yntymaqtastyq máselelerin talqylaýda, dep habarlaıdy QazAqparat.

Jıyndy ashqan QR Mádenıet mınıstri Arystanbek Muhamedıuly memleketaralyq suhbattastyqtyń mańyzdylyǵy men tıimdiligin, ásirese mádenıet salasyn damytýǵa asa mán berý qajettiligin jáne Halyqaralyq uıym qurylǵan kúninen bastap Qazaqstan ShYU mádenı vektorynyń ilgeri damýyna belsendi qoldaý kórsetip kele jatqanyn atap aıtty.
 

«Shanhaı yntymaqtastyq uıymy álemde eń serpindi damyp kele jatqan aımaqtyq uıymdardyń biri. Uıym óz qyzmetin bastaǵan 16 jyl ishinde qatysýshy memleketterdiń ekonomıkalaryn nyǵaıtý men aımaq qaýipsizdigin saqtaýda zor úles qosyp keledi», - dedi mınıstr.

Sonymen qatar ol QR Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasynda berik mádenı birtektiliksiz  kez kelgen memleket ekonomıkalyq jáne saıası jetistikke jete almaıdy dep naqty kórsetkenin eske saldy.

«Mádenıet salasy memleketterimizdiń arasyndaǵy áriptestiktiń nyq baılanystyrýshy kúshi men ózara árekettesýdiń negizine aınalýy tıis. Tabysty memlekettiń mádenı saıasaty jasampaz qundylyq baǵdarlaryn qurý arqyly qoǵamnyń turaqty damýyna baǵyttalýy tıis jáne qoǵam men memlekettiń tirshilik áreketiniń barlyq mańyzdy aspektilerin ólsheýshi qural bolyp sanalady», - dedi A.Muhamedıuly.
 

Aıta keteıik, keńes qorytyndysy boıynsha ShYU memleketteri mádenıet mınıstrleriniń hattamasy qabyldanbaq. Atalǵan qujatta qatysýshylar halyqaralyq uıym aıasynda taraptyq jáne ekijaqty mádenı baılanystardy odan ary jalǵastyrýdy, ózara túsinistik pen syılastyqty nyǵaıtýdy, túrli halyqtar men dinderdiń úılesimde ómir súrýin, mádenıetterdiń alýantúrligin saqtaýdy qamtamasyz etýge nıettes ekendikterin bildiredi.