Elordada Shyńǵyshan týraly horeografııalyq spektakl qoıylady
NUR-SULTAN. QazAqparat - «Naz» memlekettik bı teatry MKQK Qazaqstanda alǵash ret Beıbitshilik jáne Kelisim saraıynda Jastar jyly aıasynda jáne qala kúni merekesine arnap «Shyńǵyshan» horeografııalyq spektakliniń premerasyn ótkizedi, dep habarlaıdy QazAqparat.
Bul qoıylym Azııadaǵy tuńǵysh birtutas memleket qurýshy, óz zamanynyń asa iri áskerı jáne memleket qaıratkeri Shyńǵyshannyń (Temújin) ómiri men eren eńbegine arnalady. Qoıylymda ańyz-áńgimelerge súıene otyryp, Shyńǵys hannyń bala kezinen bastap, er jetip, el bılegen kezeńderi qamtylady. Óziniń áskerı talantynyń arqasynda keń-baıtaq terrıorııany basyp alyp, jarty álemge bılik júrgizgeni horeografııa tilinde kórkem beınelenedi. Qoıylym kásibı mamandardyń oryndaýda arnaıy jazylǵan mýzykamen, kórkem dekoratsııamen, sol dáýirdiń ǵajaıyp kostıýmderimen kórermendi baýrap alary sózsiz.
Óziniń qaısarlyǵynyń arqasynda ákesiniń, jarynyń kegin qaıtaryp, ulan-baıtaq jerge ıe bolyp ústemdik qurýy, zamandastarynyń ony han kóterýi bul qoıylymda asqan sheberlikpen sahnalanady.
Kostıýmder, rekvızıtter men áshekeıler Mońǵolııanyń dızaınerimen, tarıhı ónimderdiń mamandary Batbileg Lkhagvasuren birge ázirlengen. Spektakldiń daıyndyǵy Monǵolııanyń kásibı horeografy Týgsýý Týmýrhýıagpen birge ótkizildi.
