Elordada «Shyǵystyń shoqjuldyzdary» atty halyqaralyq konferentsııa ótip jatyr
Halyqaralyq túrki akademııasy uıymdastyryp otyrǵan sharaǵa túrki tildes memlekettiń resmı tulǵalary men ǵalymdary, qoǵam qaıretkeri qatysýda. Konferentsııanyń ashylýynda sóz sóılegen QR Parlament senatynyń tóraǵasy Máýlen Áshimbaev Qazaqstannyń kópvektorly syrtqy saıasatynda túrki áleminiń alatyn orny erekshe ekenin atap ótti.
«30 jyldyń ishinde elimiz álemdik qaýymdastyqtyń beldi jáne belsendi múshesine aınaldy. Táýelsizdik jyldary ulttyq negizimizge qaıta oraldyq. Tarıhymyzdy túgendedik, mádenıetimizdi túzettik, ana tilimizdi tuǵyryna qondyrdyq.
Osy jolda bul baǵyttyń órkendeýinde «Mádenı mura», «Halyq tarıh tolqynynda» sııaqty baǵdarlamalar úlken serpin berdi. Al «Rýhanı jańǵyrý» baǵdarlamasy tutas ulttyń sanasyn jańǵyrtýǵa baǵyttaldy», - degen spıker kópvektorly syrtqy saıasat búginde óz nátıjesin bergenin aıtty.
«30 jyldyń ishinde túrki elderimen yntymaqtastaǵymyz jańa bıikke kóterildi. Bul iste Elbasymyzdyń eńbegi eren ekeni sózsiz. Nursultan Ábishuly Nazarbaevtyń bastamasymen Túrki keńesi, TúrkPa, Túrksoı, Túrki akademııasy sekildi bedeldi uıymdar quryldy. Jaqynda ǵana Túrki keńesi jandanyp, ony Túrki memleketteriniń uıymy retinde qaıta qurý týraly tarıhı sheshim qabyldanǵanyn bárimiz jaqsy bilemiz. Bıyl naýryzda Túrkistan shaharynda Túrki tildes memleketterdiń yntymaqtastyq keńesiniń beıresmı sammıti ótti. Sol jıynda Prezıdentimiz Qasym-Jomart Toqaev: «Bizdiń maqsatymyz – túrki álemin HHІ ǵasyrda mańyzdy ekonomıkalyq jáne mádenı-gýmanıtarlyq keńistiktiń birine aınaldyrý», - degen edi.
«Qazirgi tańda ekonomıkalyq yntymaqtastyqty damytýdyń mańyzdy ekeni túsinikti», - dedi Máýlen Áshimbaev.
Onyń aıtýynsha, ekonomıkalyq yntymaq arqyly tutas túrki keńistiginiń baılanysyn nyǵaıtyp, ál-aýqatyn arttyrýǵa múmkindik týady.
«Sonymen qatar rýhanı úndestigimizdi damytýǵa da aıryqsha mán berýimiz kerek. Bir kezeńde túrki jurty bilim men ǵylymnyń iri ortalyǵy boldy. Túrki álemi aıtýly tulǵalardy ómirge ákeldi. Álem jurtynyń nazaryn aýdardy. Jańa zamanda da osy bıikke kóterilýge bar kúshimizdi salýymyz kerek. Osy jolda Prezıdentimiz aıtqandaı, ekonomıkamen qatar mádenı-rýhanı baǵyttarǵa da úlken mán berýimiz shart», - dedi Senat tóraǵasy.
Shara túrki halyqtary ádebıetiniń klassıkteri Nızamı Gánjaýıdiń týǵanyna 880 jyl, Álisher Naýaıdyń týǵanyna 580 jyl jáne ıÝnýs Emreniń dúnıeden ótkenine 700 jyl tolýyna oraı ótip otyr.
