Elordada Shyǵarmashyl jastardyń ortalyǵyn qurý usynyldy
NUR-SULTAN. QazAqparat – Qazaqstannyń anımatsııalyq kınostýdııalary qaýymdastyǵy elordada Shyǵarmashyl jastardyń ortalyǵyn ashýdy usyndy, dep habarlaıdy QazAqparat tilshisi.
«Elordada keremet Oqýshylar saraıy bar. Onda túrli úıirmeler jumys isteıdi jáne balalar sol jerde tálim alyp júr. Endi elordamyzǵa Shyǵarmashyl jastardyń ortalyǵy kerek. Bizdiń qaýymdastyqta qazir 8 anımatsııalyq kınostýdııa bar. Olar árbir jerde aı saıyn 300-400 myń teńge arenda tólep, jan-jaqta shashyrap júr. Eger osyndaı shyǵarmashyl ortalyq bolsa, biz bir jerde shoǵyrlanar edik», - dedi agenttik tilshisine Qazaqstannyń anımatsııalyq kınostýdııalary qaýymdastyǵynyń tóraǵasy Jánibek Orazaly.
Osy oraıda ol Nur-Sultan qalasynda bul iske úles qosa alatyn kompozıtorlar, sýretshiler bar ekenin atap ótti.
«Sonyń barlyǵyn jınaqtaıtyn shyǵarmashylyq ortalyq kerek sııaqty. Biz jalǵa alý somasyn tóleýge daıynbyz. Osy oraıda jeńildikter bolsa, tipten jaqsy bolar edi. Óıtkeni shetelden mamandar kelgen kezde, tájirıbe almasyp, birlese jumys isteıtin arnaıy oryn bolmaı tur», - dedi ol.
