Elordada shuǵyl medıtsınalyq kómekke arnalǵan halyqaralyq konferentsııa ótip jatyr
ASTANA. KAZINFORM – Elordada Eýrazııalyq shuǵyl medıtsına qaýymdastyǵynyń III sezi aıasynda «Shuǵyl medıtsınany damytýdyń zamanaýı tujyrymdamalary men perspektıvalary» atty halyqaralyq konferentsııa ótedi.
- Búgingi kúnniń mańyzdy oqıǵalarynyń biri - Ulttyq shuǵyl medıtsına úılestirý ortalyǵynyń Túrki memleketteri uıymyna múshe memleketter arasynda shuǵyl medıtsınalyq kómek kórsetý salasyndaǵy yntymaqtastyq týraly memorandýmǵa qol qoıýy bolatynyn atap ótkim keledi. Memorandýmǵa qol qoıý shuǵyl medıtsınalyq kómek júıesin damytý, kásibı tájirıbe almasý jáne ınnovatsııalyq sheshimder engizý jolyndaǵy mańyzdy qadam bolmaq, - dedi halyqaralyq is-sharany ashqan Densaýlyq saqtaý vıtse-mınıstri Tımýr Muratov.
Osy oraıda vıtse-mınıstr Qazaqstan jeriniń ulanǵaıyrlyǵyna jáne halyqtyń qonystaný tyǵyzdyǵy ártúrli bolyp keletindigine nazar aýdartty. Al bul jaıt shuǵyl medıtsınalyq kómek kórsetýde belgili bir qıyndyqtar týdyrady. Sondyqtan elimizde logıstıkanyń zamanaýı modelderi, telemedıtsınalyq sheshimder engizilip, qyzmetkerlerdiń biliktiligin arttyrý úzdiksiz júrgizilip keledi.
- Shuǵyl medıtsınalyq kómek júıesin damytý – densaýlyq saqtaý salasyndaǵy memlekettik saıasattyń basym baǵyttarynyń biri. Biz halyqaralyq yntymaqtastyqty nyǵaıtýǵa, zamanaýı tehnologııalardy engizýge, kadrlardy daıarlaýdy jetildirýge jáne kezek kúttirmeıtin kómektiń sapasy men árbir azamat úshin qoljetimdiligin arttyrýǵa múddelimiz. Konferentsııa nátıjeleri Qazaqstandaǵy shuǵyl medıtsına júıesin odan ári nyǵaıtýdyń negizi bolady dep senemin, - dedi túıindedi sózin ol.
Aıta keteıik, is-sharaǵa otandyq jáne Reseı, Ózbekstan, Qyrǵyzstan, Qytaı, Úndistan, Túrkııadan kelgen shuǵyl medıtsınalyq kómek salasyndaǵy halyqaralyq sarapshylar qatysyp otyr.
Osyǵan deıin elimizdiń densaýlyq saqtaý júıesinde meıirgerlerdiń róli edáýir artqany týraly jazdyq.