Elordada shomylý maýsymy qashan bastalady

ASTANA. QazAqparat – Bıylǵy shomylý maýsymynda Astanadaǵy sý qoımalarynda 50 súńgýir-qutqarýshy patrýldeıdi. Qalalyq Tótenshe jaǵdaılar departamenti Azamattyq qorǵanys basqarmasynyń bastyǵy Azamat Qusaıynov ákimdiktiń baspasóz máslıhatynda osynda málimet aıtty, dep habarlaıdy QazAqparat tilshisi.

«Shomylý maýsymy kezinde kúndelikti patrýldeý sharalaryna 50 súńgýir-qutqarýshy, súńgýir jabdyqtary ornatylǵan 15 jedel qutqarý tehnıkasy, 6 juzý quraly, jumyspen qamtý ortalyqtarynyń jumysshylary jumyldyrylady», - dedi ol.

Basqarma basshysy sý temperatýrasy +18 gradýstan tómen bolǵanda shomylýǵa bolmaıtynyn eske saldy.

«Sýǵa shomylý maýsymy jyl saıyn 1 maýsymda ashylady. Arnaıy jabdyqtalǵan oryndarda, jaǵajaılarda, basseınderde jáne qutqarýshylar patrýldeıtin oryndarda shomylý kerek. Saý, shynyqqan adamdar úshin qaýipsiz shomylýǵa arnalǵan sýdyń eń tómengi shekti temperatýrasy +18 gradýs, aýanyń shekti temperatýrasy +22 gradýs. Balalar men densaýlyǵy álsiz adamdar úshin mundaı temperatýrada sýǵa túsý densaýlyq pen ómirge qaýipti», - dedi Azamat Qusaıynov.