Elordada sheteldik bala kútýshi jumys berýshilerdi tonap ketti
NUR-SULTAN. QazAqparat – Nur-Sultan qalasynyń polıtsııa qyzmetkerleri osy is boıynsha 36 jastaǵy reseılik áıeldi ustady, dep habarlaıdy QazAqparat tilshisi.
Erli-zaıyptynyń úıinde bala kútýshi bolyp jumys istegen áıel úı ıeleriniń joqtyǵyn paıdalanyp, páterden altyn júzikti, ıissý men jeke zattardy urlap ketken. Osylaısha 400 myń teńgeniń zattaryn jymqyrǵan.
Jedel izdestirý jumystary barysynda polıtsııa qyzmetkerleri kúdiktiniń qaı jerde júrgenin anyqtaǵan. Belgili bolǵandaı, urlyq jasaǵan áıel jymqyrǵan dúnıelerin satyp jiberip, Almatyǵa shyǵyp ketken. Ol jaqta da bala kútýshi bolyp jumysqa turǵan.
Astanaǵa jetkizilgen RF azamaty kinásin moıyndap otyr. Sonymen birge onyń buryn da sotty bolǵany anyqtaldy.
Atalmysh is boıynsha QR Qylmystyq kodeksiniń 188-baby (urlyq) boıynsha sotqa deıingi tergeý amaldaryn júrgizýde. Ustalǵan áıeldiń osyǵan uqsas qylmystarǵa qatysynyń bar-joǵy anyqtalýda.
