17:18, 15 Qarasha 2013 | GMT +5
Elordada sheteldegi qazaq qalamgerleriniń kitaptary tanystyryldy
ASTANA. 15 qarasha. QazAqparat - Búgin S.Seıfýllın atyndaǵy Qazaq agro-tehnıkalyq ýnıversıtetinde sheteldegi qazaq qalamgerleriniń kitaptary tanystyryldy.

«Sizder bizdiń shetelde turyp jatqan baýyrlarymyzsyzdar. Jat jurtta tursańyzdarda bizdiń halqymyzdyń mádenı murasyn umytpaı, urpaqtan urpaqqa jalǵastyryp kelesizder. Bizderde jastar úshin mundaı is-sharalar jetkilikti bola bermeıdi. Óz Otanynda turyp jatqanyna qaramastan ana tilin umytqan jastardyń da bar ekendigi ras. Sondyqtan da búgingi sizderdiń kitaptaryńyzdyń tusaýkeseri olarǵa sabaq bolsyn», - dedi atalǵan ýnıversıtettiń prorektory Jaınagúl Qusaıynova.
Aıta keterligi, Dúnıejúzi qazaqtary qaýymdastyǵynyń qarjysy esebinen qazaq tilinde qalam tartatyn, búginde shetelde turatyn 12 tanymal qalamgerdiń shamamen 60 kitaby jaryq kórdi. Olardyń qatarynda Qajyǵumar Shabdanulynyń 6 tomdyǵy, Úzben Qurmanbaıulynyń «Máńgilik el» kitaby bar.