Elordada «Shámshi» mıýzıkli kórermen nazaryna usynyldy
1 naýryz kúni Qazaqstan Respýblıkasy Táýelsizdiginiń 30 jyldyǵyna oraı qazaqtyń kompozıtory Shámshi Qaldaıaqovtyń ómiri men shyǵarmashylyǵynan kórinis beretin «Shámshi» mıýzıkliniń premerasy ótti. Avtory – Mádına Omarova, qoıýshy rejısseri – Qazaqstannyń eńbek sińirgen qaıratkeri Ashat Maemırov, rejısserdiń assıstenti – Mekan Djýmabaev.
«Qoıylymnyń tusaýkeseri 1 naýryz – Alǵys aıtý kúnimen tuspa-tus kelgendikten teatr ujymy qoǵamda paıdaly ári ıgi ispen aınalysyp júrgen volonterlerdiń eńbegin eleýdi jón kórdi. Olarǵa alǵys bildirý maqsatynda spektaklge elordamyzdyń 30-ǵa jýyq jas volonterleri arnaıy shaqyryldy», delingen habarlamada.
Teatr dırektory, Qazaqstannyń eńbek sińirgen qaıratkeri Ashat Maemırov: «Qıyn kezeńde kómek berip, memlekettiń kóterip jatqan úlken júgine aralasyp, teńizge tamǵan tamshydaı bolsa da, úlken eńbek etkenderińiz úshin myń alǵys! Búgingi mereke qutty bolsyn!» - dep premerany alǵyspen bastady.
Qoıylym belgili tulǵanyń kúresker, ǵashyqtyq jáne kompozıtorlyq qyrlaryn kórsetti. Naqtyraq aıtqanda, kúresker Shámshiniń rólin Aman Ǵumarov, kompozıtor Shámshiniń rólin Sultan Keńshilik, ǵashyq Shámshiniń rólin Salamat Muqashev somdady. Úsh akter sahna aldynda kompozıtordyń ómir jolynda kezikken qıyndyqtaryn, adam men qoǵamǵa degen fılosofııasyn, ishki jan dúnıesindegi tolqyǵan sezim ıirimderin, ǵashyqtyq syrlaryn áýezdi ánder arqyly kórermenderge jetkize bildi. Sonymen qatar qonaqtar mıýzıklde Muqaǵalı Maqataev, Roza Baǵlanova, Ábilahat Espaev, Tólegen Aıbergenov, Jumeken Nájimedenov, Aqan seri syndy tulǵalardyń beınelerin kezdestirip, olar Shámshiniń ónerin qalaı qoldap, shyńdala túsýine qandaı septigin tıgizgenderine kýá boldy.
Mýzykalyq jas kórermen teatry «Shámshi» mıýzıkli arqyly óner jolyna qyzyǵýshylyqpen qaraıtyn daryndy jasóspirimder men balalardyń qııalyn qozǵap, olardy ónerge qyzyqtyryp, qanattandyrdy. Qoıylymdy tamashalaǵan jas kórermen Shámshige qarap, onyń shyǵarmashylyǵyna zer salyp, kúrdeli ómir jolyndaǵy kıeli ónerdiń baǵasy adamzat ǵumyryn arnaýǵa turatyndaı qudiretti de taza ekendigine kóz jetkizdi.
Teatrdaǵy Kameralyq orkestrdiń súıemeldeýimen ótken spektaklde uly kompozıtordyń 15-ke jýyq ánderi oryndaldy. «Jan aǵa», «Arys jaǵasynda», «Ánim sen ediń», «Qaıyqta», «Ómir ózen», «Baqyt qushaǵynda», «Saǵynyshym meniń», «Qýanysh valsi», «Aq mańdaılym», «Syǵan áni», «Aqan Seri», «Ana týraly jyr», t.b. ánderi kórermenniń kóńilin baýrap, júrek túkpirindegi meıirimi men mahabbatyn oıata tústi.
Qala turǵyndary men qonaqtary «Shámshi» mıýzıklin 2, 3 naýryz kúnderi tamashalaı alady.
