Elordada Shámshi Qaldaıaqovty eske alý kontserti ótedi
ASTANA. QazAqparat - Astanada qala kúni qarsańy - 4 shildede Shámshi Qaldaıaqovty eske alýǵa arnalǵan «Ánim sen ediń» atty kontsert ótedi, dep habarlaıdy Astana qalasynyń16 jyldyǵyna arnalǵan merekelik sharalardy daıyndaý jáne ótkizý jónindegi uıymdastyrý komıtetiniń medıa-shtaby.
Tanymal kompozıtor, «qazaq valsiniń koroli» atanǵan sazger, Ánuranymyzdyń avtory - Shámshi Qaldaıaqovqa arnalǵan eske alý kontsertin «Qazaqstan» OKZ ótkizý josparlanǵan.
Sh.Qaldaıaqov áli kúnge ómirsheńdigin joımaǵan saǵynyshqa toly ásem ánderimen este qalǵan aıaýly kompozıtor. Onyń ánderin búginde qazaq ánshileriniń basym bóligi oryndaıdy jáne halyq asqan súıispenshilikpen tyńdaıdy.
Astana ákimdigi jyl saıyn mýzyka óneriniń kórnekti tulǵalarynyń shyǵarmashylyǵyna arnalǵan úlken kontsertter uıymdastyrady. Bul rette sátimen ótken Múslim Magomaev, Aleksandr Zatsepınge arnalǵan keshterdi atap ótýge bolady. Jańa joba da tanymal ánshilerdiń oryndaýyndaǵy saǵynyshqa toly eski ándermen, tosyn syılarmen, kútpegen qoıylymdarymen este qalmaq.
Kontsertte Shámshiniń kópke taralǵan tanys ánderi ǵana emes (kompozıtordyń 300 áni bar), kópshilikke jetpegen shyǵarmalary da oryndalady. Osy tektes Astana estrada-sımfonııalyq orkestriniń súıemeldeýimen ótetin kontsertter dástúrge aınaldy. Osy joly da orkestr qatysýymen uıymdastyrylatyn merekelik kontsertte Roza Rymbaeva, Álibek Dinishev, Medeý Arynbaev, Marjan Arapbaeva, Jubanysh Jeksenuly, Altynaı Jorabaeva, «MýzArt», «Rin'Go», «KeshYou», «Melo'Men» toptary, opera juldyzdary Gúlzat Dáýirbaeva men Súndet Baıǵojın óner kórsetedi.
Aıta keterligi, atalmysh keshte Álibek Dinishev alǵash ret Shámshi ánderin oryndaıdy Kesh júrgizýshileri Azamat Satybaldy, Olga Spırına, Syrym Qashqabaev jáne Janna Áýbákirova. Kompozıtordyń otbasy músheleri keshtiń qurmetti qonaqtary bolmaq. Kontserttiń telenusqasy «Qazaqstan» «Habar», «Bilim jáne Mádenıet» telearnalary efırinen taratylady.
