Elordada shalǵaıdaǵy nysandardy elektr qýatymen qamtamasyz etýde balamaly energııa kózderin paıdalaný máselesi talqylandy
ASTANA. 27 maýsym. QazAqparat - Elordada «Tabıǵat álemi» ekologııalyq-aǵartý ortalyǵy «Shalǵaıdaǵy nysandardy jappaı elektr qýatymen qamtamasyz etý maqsatynda balamaly energııa kózderin engizý» taqyrybynda dóńgelek ústel uıymdastyrdy.
Bul aqparatty atalǵan ortalyqtan habarlady.
2010-2014 jyldarǵa arnalǵan QR Údemeli ındýstrııalyq-ınnovatsııalyq damýy baǵdarlamasyna sáıkes, 2015 jyly qaıta qalpyna keletin energııa qýatyn paıdalaný mólsheri 1 paıyz, al 2024 jyly 5 paıyzǵa deıin óndiriletin bolady dep josparlanǵan. Qazaqstanda sarqylmas energııa kózderin paıdalanýdyń múmkindigi orasan. Degenmen, búgingi tańda elimizdiń aýmaǵynda balamaly energııa qýaty keńinen qoldanylmaı keledi. Respýblıka turǵyndarynyń basym bóligi mundaı qýat kóziniń paıdasy zor ekeni jaıly beıhabar.
Osyǵan baılanysty aǵymdaǵy jyly Jahandyq ekologııalyq qordyń Shaǵyn granttar baǵdarlamasynyń qarjylyq qoldaýymen «Tabıǵat álemi» ekologııalyq-aǵartý ortalyǵy Ústirt jáne Qorǵaljyn memlekettik tabıǵı qoryqtarynda, sondaı-aq «Aqjaıyq» memlekettik tabıǵı rezervatynyń aýmaǵynda birneshe mólsherli qýaty bar 6 kún generatoryn ornatty.
Qazirgi ýaqytta erekshe qorǵalatyn tabıǵı aýmaqtarda qordalanǵan problemalar jeterlik. Ásirese, kordondar men jyljymaly turǵyn vagondaryn elektrmen qamtamasyz etý máselesi ótkir tur. Qoryqtardyń, ulttyq parkter men tabıǵı rezervattardyń alystaǵy statsıonarly kardondaryna deıin júzdegen shaqyrymǵa elektr jelilerin tartý ekonomıkalyq turǵydan da, ekologııalyq turǵydan da alyp qaraǵanda - tıimsiz. Osy oraıda, elektr symdarynyń zardaby, kóbine, qustarǵa tııýde. Sonymen qatar, tabıǵatty qorǵaý mekemeleriniń bıýdjet kólemi de shamaly bolǵandyqtan, bul máseleni ózdiginen sheshýge múmkindikteri joq.
Ornatylǵan fotoelektrstantsııalar eldi-mekenderden shalǵaıda ornalasqan statsıonarly kordondar men jyljymaly turǵyn vagondarynda turatyn ınspektorlar men ǵylymı qyzmetkerlerdiń áleýmettik-turmystyq jaǵdaıyn jaqsartýmen qatar, erekshe qorǵalatyn tabıǵı aýmaqtarda janýarlar men ósimdikter álemin qorǵaý baǵytyndaǵy jumystyń sapasyn arttyrýǵa yqpaly tımek ári aýany lastaıtyn zattardyń kólemin jylyna bir jarym tonnaǵa deıin azaıtýǵa septigi bolady.
Dóńgelek ústeldiń jumysyna QR Aýyl sharýashylyǵy, Indýstrııa jáne jańa tehnologııalar mınıstrlikteriniń, BUU DM, «NurOtan» HDP, «QazAgroInnovatsııa» AQ ókilderi, JEQ/Búkilálemdik banktiń menedjerleri, sondaı-aq tabıǵı resýrstar jáne tabıǵatty qoldaný basqarmalarynyń, orman jáne ańshylyq sharýashylyǵy aýmaqtyq ınspektsııalarynyń ókilderi, erekshe qorǵalatyn tabıǵı aýmaqtardyń dırektorlary men orynbasarlary qatysty.
Shara barysynda jınalǵandar elimizde sarqylmas energııa kózderin paıdalaný máselelerin talqyǵa salyp, jıyn sońynda usynymdar toptamasyn qabyldady.
Shara Jahandyq ekologııalyq qory Shaǵyn granttar baǵdarlamasynyń qarjylyq qoldaýymen ótti.
