Elordada Shákárimniń 160 jyldyq mereıtoıyna arnalǵan kesh ótti
ASTANA. QazAqparat - Ádebı-sazdy keshte Shákárimniń buryn-sońdy aıtylmaǵan óleńderi oryndalyp jáne arnaıy qonaq retinde urpaǵy shaqyryldy, dep habarlaıdy QazAqparat tilshisi.
Bıyl uly aqynnyń týǵanyna 160 jyl, osyǵan oraı týǵan ólkesi Semeıden bastaý alyp, respýblıkalyq kólemde kóptegen mádenı-aǵartý sharalar ótýde. Búgin Astana tórinde aıtýly aqyn mereıtoıyna oraı «Bostandyq tańy atty, qazaǵym kórińder» atty ádebı-sazdy kesh ótkizildi.
Keshti belgili akademık, shákárimtanýshy Ǵarıfolla Esim júrgizdi, mádenı shara barysynda qazaq aqynynyń kópke tanymal jáne buryn-sońdy oryndalmaǵan ánderi aıtylyp, óleńderi oqyldy.
Sonymen qatar, shara barysynda qurmetti qonaq retinde shaqyrylǵan Sh.Qudaıberdiulynyń urpaǵy Nurbek Qabykenuly arǵy atasyna qatysty estelik derektermen bólisti.
«Shákárimniń qaıtys bolǵan soń jer qoınaýyna tapsyrylmaı 30 jyl boıy qudyqta jatqanyn biri bilse, biri bilmeıdi. Tek qana 1961 jyly tamyzda uly Ahat pen meniń ákem Qabyken, Baqanas degen jerden súıegin qazyp alyp, elge ákelip, quran baǵyshtap nemere aǵasy A.Qunanbaıulynyń qasyna jerledi», - dedi uly aqyn urpaǵy Nurbek Qabykenuly.
Mádenı shara «Rýhanı jańǵyrý» baǵdarlamasy aıasynda Astana qalasynyń Tilderdi damytý jáne arhıv isi basqarmasynyń uıymdastyrýymen ótti.
