Elordada shaǵyn fýtboldan QR Prezıdentiniń sýperkýbogy ótip jatyr
NUR-SULTAN. QazAqparat – Nur-Sultan qalasynda áýesqoı shaǵyn fýtbol lıgalary júldegerleriniń arasynda Qazaqstan Respýblıkasy Prezıdentiniń sýperkýbogy úshin báseke ótip jatyr, dep habarlaıdy QazAqparat tilshisi.
«Táýelsiz elimizdiń tarıhynda alǵash ret shaǵyn fýtboldan áýesqoı oıynshylar arasynda sýperkýbok uıymdastyrylyp otyr. Jalpy sany 5 lıga jáne ár lıgadan úzdik degen 2 komanda iriktelip alynyp, barlyǵy 10 komanda baq synaýda. Mundaǵy basty maqsat – Memleket basshysy Joldaýynda aıtylǵan buqaralyq sportty damytý tapsyrmasyn júzege asyrý, úles qosý. Jáne fýtbol týrnırin jyl saıyn ótkizip, dástúrge aınaldyratyn bolamyz», - dedi sporttyq sharanyń ashylý saltanatynda QR Prezıdentiniń Baspasóz hatshysy Berik Ýálı.
Onyń aıtýynsha, áýesqoı shaǵyn fýtboldan Qazaqstan Respýblıkasy Prezıdentiniń sýperkýbogyn jeńgen komandaǵa 1 mln teńgeni syıaqy beriledi.
«Ózderińiz biletindeı, Memleket basshysy ár sózinde halyqtyń sportpen aınalysýyna jaǵdaı jasaý kerektigin jáne buqaralyq sporttyq keńinen nasıhattaý qajettigin basym aıtady. Búgingi shara sonyń bir kórinisi jáne bul óskeleń urpaq úshin oń úlgi. Sizderge Memleket basshysynyń sálemdemesin tikeleı alyp kelip otyrmyn. Saıys bolǵannan soń mindetti túrde jeńimpaz anyqtalýy tıis, sondyqtan da myqty degen komanda utyp shyqsyn deımin. Barlyq qatysýshylarǵa sáttilik tileımin», - dedi ol.
«Astana Arena» kesheninde búgin alǵash bolyp «A» jáne «B» tobynda 10 komanda ózara baqtaryn synaýda.
Dodaly jarysqa memlekettik sonymen qatar memlekettik emes uıym ókilderinen quralǵan fýtbol komandalary da qatysyp jatyr.
Aıta ketý kerek, aıtýly shara kórermensiz ótip jatyr jáne barlyq sanıtarlyq talaptar saqtalǵan.
